«Арсенал» клуби жамоанинг янги ҳимоячиси Юрриен Тимбер жиддий жароҳат олганини тасдиқлади.

АПЛдаги дебютини «Ноттингҳэм Форест»га қарши баҳсда ўтказган 22 ёшли нидерландиялик ҳимоячи 2-бўлимнинг бошида жароҳат сабабли ўйинни давом эттира олмаганди. Клуб хабарига кўра, Тимбернинг ўнг тизза хочсимон пайлари узилган ва у узоқ муддатга сафдан чиққан. Футболчи яқин кунларда жарроҳлик амалиётини ўтказади.

Маълумот учун, «канонирлар» Тимберни 40+5 млн евро эвазига «Аякс»дан трансфер қилганди.

Эслатиб ўтамиз, ўтган бир ҳафта давомида Тибо Куртуа, Эдер Милитао, Кевин де Брюйне сингари футболчилар хочсимон пайларнинг узилиши оқибатида узоқ муддатга сафдан чиққани эълон қилинганди.