«Манчестер Юнайтед» ҳимоячиси Ҳарри Магуайр жамоани тарк этиш арафасида турибди.

Инсайдер ва журналист Фабрицио Романога кўра, «Вест Ҳэм» Англия миллий жамоаси ўйинчиси трансфери бўйича «МЮ» билан келишувга эришган. 30 ёшли ҳимоячи 30 миллион фунт эвазига Лондон клубига кўчиб ўтади. 

Қайд этилишича, «Вест Ҳэм» бош мураббийи Дэвид Мойес Магуайрга жамоа сардорлигини ҳам ваъда қилган. Футболчи ва клуб ўртасида ҳам тез орада келишувга эришилиши кутилмоқда.

Аввалроқ, «МЮ» «Вест Ҳэм»нинг Скотт Мактоминей бўйича 30 миллион фунтлик трансфер таклифини рад этгани хабар қилинганди.