«Реал» ҳужумчиси Винисиус Жуниор мадридликларнинг кетма-кет иккинчи ўйинини ҳам ўтказиб юборади.

«Севилья»га қарши ўйин олдидан «Реал» бош мураббийи Карло Анчелотти бразилиялик ўйинчи жароҳати сабабли сафардаги баҳсда майдонга туша олмаслигини маълум қилди. Унинг айтишича, Винисиусни тиззасидаги жароҳат безовта қилмоқда.

«Умид қиламанки, Винисиус Ла Лига сўнгги туридаги «Атлетик»га қарши баҳсда бизга ёрдам бера олади», - дейди италиялик мутахассис.

Аввалроқ, Ла Лига Винисиуснинг «Валенсия»га қарши ўйиндаги (0:1) қизил карточкасини бекор қилганди. Шундан кейин унинг «Райо Вальекано» (2:1) билан баҳсда майдонга тушиши кутилган, аммо футболчи «Месталья»да ирқчиликка учраганидан кейин руҳан ўйинга тайёр эмаслиги сабабли майдонга тушмагани ҳақида хабар қилинганди.