Эдерсон «Манчестер Сити» футболчиларининг муваффақиятида Пеп Гвардиола катта ҳисса қўшганини таъкидлади. 

«Бир ўйин бўлганди – «Манчестер Юнайтед» ёки «Ливерпул»га қарши, аниқ эсимда йўқ – биз бутун ҳафта давомида маълум бир услубда ўйнаш учун машғулот ўтказгандик. Бироқ ўйин олдидан мураббий фикрини бутунлай ўзгартириб, биз бошқача ўйнаймиз, деган қарорга келди. Ва биз ўша баҳсда ғалаба қозондик! Бу футболчиларнинг Пепга ва унинг ишига ишонишидан далолат беради. 

У жуда талабчан, лекин шу билан бирга бизга майдонда эркинлик ва ўзимиз бўлишимиз учун ишонч беради. «Сити»да у билан бирга ишлаган қанча ўйинчилар ўсишга эришгани ҳайратланарли. Бу қойилмақом. 

Эрлинг Ҳоланд, эҳтимол,  жамоамизга юлдуз сифатида қўшилган ягона ўйинчи бўлса керак. Мен, Аймерик Лапорт, Жон Стоунз, Рубен Диаш ва Бернарду Силва каби футболчилар «Сити»га келганимизда юлдуз эмасдик. Биз Пеп билан анча яхшиландик, чунки у ҳар бир футболчидан унинг максималини сиқиб чиқаришга қодир. Бу — унинг кучли томонларидан бири», — дея «Манчестер Сити» дарвозабонининг сўзларини келтиради FourFourTwo.