Винисиус Жуниорнинг дисквалификацияси бекор қилинди. 

Бразилиялик футболчи Ла Лиганинг 35-туридан ўрин олган «Валенсия» (0:1) билан баҳсда, футболчилар ўртасидаги можаро пайтида унинг томоғидан бўғган рақиб ҳужумчиси Уго Дуронинг юзига мушт туширганди. Бош ҳакам Рикардо Бенгоэчеа видеотакрорни кўриб, 22 ёшли вингерга қизил карточка кўрсатган, Дуронинг ҳаракатларини эса эътиборсиз қолдирганди. 

Кейинчалик Игнасио Иглесиас Виллануева бошчилигида ВАРда ишлаган ҳакамлар Испания Қироллик футбол федерацияси томонидан четлатилди. 

Маrca хабарига кўра, спорт мусобақалари қўмитаси кўп соатлик муҳокамалар натижасида Винисиусдан дисквалификацияни олиб ташлашга қарор қилди. Бунга ҳакамларнинг эпизодни нотўғри баҳолашгани сабаб сифатида кўрсатилган.

Шу тариқа, Вини бугун, 24 май куни бўлиб ўтадиган 36-тур доирасидаги «Райо Валекано»га қарши ўйинда иштирок этиши мумкин.