Бир неча йил ўтиб бу йигитлар топ-клубларда жавлон уриши мумкин.
20 май куни Аргентинада 20 ёшгача бўлган футболчилар ўртасида жаҳон чемпионати старт олди. Одатда айнан шундай турнирларда ўзини кўрсатган ёш футболчилар кейинроқ топ клубларда пайдо бўлишади. Қуйида ушбу турнир кашфиёти бўлиши кутилаётган футболчилар санаб ўтилади.
Федерико Редондо — 20 ёш, Аргентина
Феденинг фамилияси тасодифий эмас — у «Милан» ва «Реал» клублари афсонаси Фернандонинг ўғли ҳисобланади. Катта Редондо уч бор Чемпионлар лигасида ғолиб чиққан, ўғли ҳам шундай натижаларга эришишни истайди:
«Мен ҳамиша «Реал»нинг фанати бўлганман. Қачондир ўша ерда ўйнашни орзу қиламан», деган Аргентина ёшлар жамоаси яримҳимоячиси.
Федерико таянч яримҳимоячиси позицияси вакили бўлиб, жорий мавсумдан барқарор ўйин амалиётига эга бўлмоқда — айни вақтда «Аргентинос Хуниорс» клуби аъзоси. У дебют голини бир ой олдин урганди. Асосий фазилатлари — тиришқоқлик, техника ва жисмоний ҳолат — Редондонинг кўрсаткичлари жуда яхши.
Айни вақтда Аргентина U-20 жамоасига устозлик қилаётган Маскерано турнирнинг очилиш ўйинида (Ўзбекистон U-20 жамоасига қарши 2:1) Редондони иккинчи бўлимда захирадан туширди.
Максимо Перроне — 20 ёш, Аргентина
Бу йигит — мезбонлар яримҳимояси етакчиси. Айниқса, Нико Пас йўқлигида — «Реал» бу истеъдодли футболчисини жаҳон чемпионатига қўйиб юбормади (Гарначога рухсат бермаган «МЮ» каби). Максимо Аргентина чемпионатида порлаган, бир мавсумнинг ўзида истиқболли ўсмирдан «Велес Сарсфилд» клуби етакчисига айланган — ва қишда 8 млн евро эвазига «Манчестер Сити» сафига келиб қўшилган. Карлос Тевеснинг мухлиси сифатида 32-рақамли футболкани ўзиники қилган.
Перроне худди Редондо каби таянч яримҳимоячиси ва бу икки истеъдодли футболчи бошланғич таркиб учун рақобат қилади (биринчи ўйинда Редондо айнан Перроне ўрнига туширилди). Федерико рақиб ҳужумларини бузишда яхши ва рақибни алдаб ўтишни ёқтиради, Максимо эса тўпни ушлашда яхши ва узатмаларда деярли хатога йўл қўймайди, барчадан кўпроқ меҳнат қилади ва барчадан кўпроқ югуради.
Андрей Сантос — 19 ёш, Бразилия
Етакчи ва сардор, асосий истеъдод ва келажак рамзи. Андрей Сантос аллақачон кенг доираларда ҳам танилиб бўлган: кузда ёрқин ўйин намойиш этган, қишда «Челси» сафига ўтган, баҳорда эса — 20 ёшгача бўлган футболчилар ўртасидаги Америка Кубогида асосий юлдуз бўлди. Ўша турнирда у беш гол урди, шундан биттаси — финалда ғалаба голи бўлди. Ҳолбуки Сантос — яримҳимоячи ва ҳимояга яқинроқ ўйнайди.
Аммо Копа Америкадан кейин Андрей «Челси»да ушланиб қолмади ва ўзининг олдинги клуби «Васко да Гама»га ижарага берилди. Бу ижаранинг асосий шарти ЖЧ U20 эди — Бразилия клуби уни турнирга юборишга рози бўлиши керак эди. Шу шарт туфайли, масалан, нисбатан кучлироқ бўлган «Палмейрас» клубига ижара варианти бекор бўлди.
Матеус Насименто — 19 ёш, Бразилия
Бу жамланмадаги илк форвард . Насименто ҳали ёш, аммо аллақачон топ клублар скаутлари назарига тушган. Сўнгги ярим йилликда унга «Реал» томонидан ҳам қизиқиш пайдо бўлди, Marca нашрининг қўшимча қилишича, Мадрид клуби скаути Дани Калафат — унинг фанатига айланган.
Ва Матеус чиндан ҳам «Реал»нинг ўйин услубига мос тушиши мумкин. Унинг ўйини Карим Бенземанинг сўнгги йиллардаги ўйинини эслатади: жарима майдони ташқарисида комбинацияларда боғловчи вазифасини бажаришни, анча орқароқдан ўйнашни ва ҳатто айрим эпизодларда «ўнлик» позициясида ҳаракатланишни хуш кўради. «Ботафого»даги ушбу истеъдодли футболчининг камчиликлари эса оддий: у барча қулай вазиятларидан ҳам фойдалана олмайди, чунки етарлича ўйин амалиётига эга эмас. У ўз имкониятларини тўла намоён этиши учун яна бир-икки йил вақт керак. Жаҳон чемпионати — муваффақият сари муҳим қадамдир.
Кендри Паэс — 16 ёш, Эквадор
Ҳа, у 16 ёшда. Паэс — бу мавсум Жанубий Америкадаги асосий кашфиётлардан бири. «Челси» ушбу ҳавбекнинг трансфери учун 20 млн евро беришга тайёр. Агар унинг истеъдодига кимдадир шубҳа бўлган бўлса, бу шубҳалар бир ой муқаддам Копа Америка U17 турниридаги ўйинларидан кейин тарқаб кетгани тайин. У ўша турнирда ўзини тўлиқ намойиш этганди: чиройли ассистлар, ёрқин комбинациялар ва рақибларни алдаб ўтишлар — булар Кендрини машҳур қилди.
Ушбу ўсмир ахборот майдонида қўққисдан пайдо бўлгани йўқ. Февралда, у ҳали 15 ёшлигида «Индепенденте»нинг асосий таркибида ўйнаганди, шундан кейин дарҳол ОАВда топ-клубларнинг қизиқишлари ҳақида хабарлар тарқалди. Кендри Аргентинадаги турнирга ҳам олиб келди ва АҚШга қарши биринчи тур ўйинида (0:1) 74 дақиқа ўйнади.
У «ўнлик» вазифасини бажариши ҳам, майдон марказида ва қанотларга яқин жойлашиб ўйнаши ҳам мумкин. У уч марказий ҳимоячидан иборат схемада олдинроқда жойлашганида энг яхши ўйинларини кўрсатади. Узатмалари жуда яхши, биртепар услубида аниқ ўйнашга ҳаракат қилади. Баъзида финт қилишга берилиб кетади, чунки барчасини ўзи ҳал қилишига умид қилади.
Алекс Скотт — 19 ёш, Англия
Алекс ҳақидаги икки факт унга тўлиқ таъриф беради: уни чемпионшипнинг энг яхши ёш футболчиси сифатида тан олишди, Пеп Гвардиола эса у ҳақида шундай сўзларни айтди:
«Скотт ҳақиқатан яхши футболчи ва ажойиб истеъдод ҳисобланади. Ақл бовар қилмас футболчи».
«Бристол Сити»нинг асосий таркиб футболчиси саналган Алексни Жек Грилиш билан қиёслашмоқда ва ҳатто унга гернлик Грилиш дея лақаб қўйишган — чунки у Нормандия оролларидан бири бўлмиш Гернсида туғилган. 12 ёшида «Саутҳемптон» уни академияга қабул қилмаган ва Скотт футболни ташлаш ҳақида ҳам ўйлаб қолган. Аммо кейин диққатини йиғиб, яна ўз устида ишлашга киришган.
Ушбу яримҳимоячининг асосий сифати — универсализм. Ўтган мавсумда Алекс ўнгда ўйнаганди, энди эса марказда жавлон урмоқда. У ўзида плеймейкерлик ва бузувчилик сифатларини бирлаштирган, унинг тезлиги, техникаси, майдонни кўриши ва тўпларни қайтариши ҳам яхши. Скотт – ўз жамоасида ҳал қилувчи узатмалар ва тўпга эгалик қилишда энг яхшиси, паслар аниқлиги ва тўпга тегинишлар сони бўйича – иккинчи кўрсаткични қайд этган.
Чезаре Казадей — 20 ёш, Италия
Чезаре — ҳозирдан жаҳонгаштага айланган: ўтган мавсумда «Интер» U19 жамоасида кучли ўйин кўрсатган (17+5), кейин «Челси» U21 жамоасига келиб, АПЛнинг ёшлар ўртасидаги лигасида иштирок этган, ҳозир эса ижара асосида «Рединг»да ўйнамоқда. У катталар футболидаги биринчи ва ҳозирча ягона бўлиб турган голини март ойида «Блэкберн» дарвозасига урди. У олдинги чизиқда вазиятни кескинлаштириш учун ҳаракат қилувчи универсал яримҳимоячидир. Узоқдан жуда яхши зарбалар бера олади. Италияда уни Милинкович-Савич билан қиёслашарди: менталитет, атлетизм, майдондаги ролидан келиб чиққан ҳолда. Бир сафар, онасининг жазосидан кейин Казадей уйидан «Чезена»нинг машғулот базасига қадар бўлган 22 км масофани пиёда босиб ўтган.
Уилсон Одобер — 18 ёш, Франция
У топ-5 лигаларда бу мавсумда гол урган 18 ёшли кам сонли футболчилардан бири бўлди. «ПСЖ» қўйиб юборган навбатдаги истеъдод: Одобер ўтган йил ёзида Париждан «Труа»га эркин агент сифатида ўтганди. Ўтган мавсумда парижликларнинг U19 жамоасида 31 ўйинда 20 гол урган. У «Роме», «Брюгге» ёки Мёнҳенгладбаҳнинг «Боруссия» клубларидан бирига йўл олиши мумкин эди, аммо кўпроқ ўйнаш учун Францияда қолишга қарор қилди.
Уилсон — универсал ҳужумчи: асосан ўнгда ўйнайди, аммо, масалан, Франциянинг 19 ёшгача бўлган футболчилари жамоасида чапда ҳам ўйнатилди. Одобернинг тезлиги яхши, дриблинг ва ҳужумларни якунлашда ҳам тезкорлик билан ҳаракат қилади.
Гэбриел Слонина — 18 ёш, АҚШ
Ўтган мавсумда МЛС чемпионатида барчани ўзига қаратган дарвозабон. Баҳорда Слонинага «Челси» ва «Реал» қизиқиш билдирди, якунда Гэбриел Лондонга кўчиб ўтди. Январда миллий жамоада дебют қилди ва жамоа тарихидаги энг ёш дарвозабонга айланди. Асосий жамоада қатор ажойиб сейвлар амалга оширишга улгурди.
Аргентинадаги турнирга у жамоа етакчиси сифатида ташриф буюрди. L'Equipe Гэбриелни 2003 йилдан кейин туғилган истеъдодли футболчилар топ-еттилигига киритган.
У биринчи турда Эквадорга қарши ўйинда (1:0) дарвозаси дахлсизлигини сақлаб қолди.
Аббосбек Файзуллаев — 19 ёш, Ўзбекистон
Сўнгги йилларда ёшлар ўртасидаги жаҳон чемпионатларида кўриниш бермай қўйган Ўзбекистон бу сафар уддалади. Аббосбек эса — бу биринчиликдаги ёрқин футболчилар сафидан жой олишга ҳақли.
Файзуллаевни Тошкентда бўлиб ўтган Осиё Кубоги U20 турнирининг энг яхши футболчиси сифатида тан олишди, у жамоаси билан турнирда чемпион бўлди ва жаҳон чемпионатига йўлланма олди. Ушбу вингер тўпга биринчи тегинишда ва ҳужумларни бошлашда ажойиб, рақибларни доимо босим остида ушлаб туради: эпчил, технар, тезкор. Тошкентдаги турнирда жарима зарбасидан тўққизликни аниқ нишонга олганди. 2021 йилдан буён «Пахтакор»нинг асосий таркибида ўйнаб келмоқда ва ҳозирга келиб жамоа етакчисига айланган.
