Лионель Месси «ПСЖ» таркибидан четлатилганидан кейин илк марта асосий таркибда майдонга тушади. Бу ҳақда «ПСЖ» устози Кристоф Гальтье маълум қилди.

«Албатта, Лео билан у машғулотларга қайтгандаёқ гаплашган эдик. Мен унинг руҳий ҳолати ва тайёргарлиги ҳақида билмоқчи эдим, у жуда хотиржам эди.

Мессида эртанги ўйин олдидан мотивация кучли ва у ўйнашни истамоқда. Лео яна бир совринга эга чиқмоқчи. У эртанги ўйинни асосий таркибда бошлайди», - дейди Гальтье.

Маълумот учун, Месси 2 май куни Саудия Арабистонига клуб рухсатисиз йўл олгач, бир ҳафтага жамоа машғулотларидан четлатилганди. У клуб ва жамоадошларидан кечирим сўрагач, таркибга қайтди. «ПСЖ» - «Аяччо» ўйини 13 май куни соат 23:59да бошланади. Клуб 34-турдан кейин 78 очко билан энг яқин таъқибчисини 6 очкога ортда қолдирмоқда. Жамоа қолган 4 ўйинда 2 ғалабага эришса, Франция чемпионига айланади.