«ПСЖ» бош мураббийи Кристоф Гальтье Лионель Мессининг жамоа машғулотларидан четлатилиши борасида илк марта гапирди.

Аргентиналик 35 ёшли юлдуз клуб рухсатисиз Саудия Арабистонига боргани учун Париж жамоаси томонидан 2 ҳафталик четлатиш билан жазоланди. У «Труа» ва «Аяччо»га қарши баҳсларда майдонга тушмайди.

«Ушбу ҳафта бошида раҳбарият Леони четлатиш борасида менга маълум қилди. Бу ҳақда менга хабар берилгач, бу масалани муҳокама қилмаслик бўйича жавобгарликни ўз бўйнимга олгандим. Тушунинг, мен клуб ходимиман, қарор қабул қилингач, буни муҳокама қилиб ўтирмайман.

Бу масалада қарорни мен қабул қилишим керак эмасди. Менга бу ҳақда айтишди ва бунга бўйсунишим лозим. 

Месси қайтса, нима бўлишини кўрамиз. Клубда бу масалани муҳокама қиламиз, Лео ҳам ўз фикрларини билдиради», - дейди Гальтье.

Аввалроқ, Гальтье Месси четлатишдан кейин қайтгач, кейинги ўйинларда жамоага ёрдам беришини исташини маълум қилганди.