«Тоттенҳэм» бош мураббийи Антонио Конте АПЛ 28-туридан ўрин олган «Саутҳэмптон» (3:3) билан ўйиндан сўнг ўз фикрларини билдирди.
«Шпорлар» 3:1 ҳисобида ғалаба қозонишаётганди, аммо иккинчи бўлим сўнгида ғалабани қўлдан чиқаришди.
«Менимча, ҳозир гаплашиб олиш учун тўғри вақт, чунки вазиятни қабул қилиб бўлмайди. 3:1 ҳисобида ғалаба қозонаётгандик, ўйинни назорат қилдик, лекин икки марта тўп ўтказиб юбордик ва кўпроқ гол хавфи ҳам бор эди — Фрэйзер Форстер бизни қутқариб қолди.
Ҳозир муаммони чуқур ўрганган маъқул, чунки биз жамоа эмасмиз. Биз майдонга тушган шунчаки 11 футболчимиз. Мен ўз шерикларига ёрдам беришни истамайдиган, ўз ишига жонини куйдирмайдиган худбинларни кўряпман. Шу кунгача мен бу мавзудан қочдим, жамоавий руҳни яхшилашга ҳаракат қилдим. Тактик ва техник жиҳатлар бошқа нарса. Агар сиз рақобатбардош бўлишни истасангиз, ғалаба қозониш учун курашишингиз керак. Энг муҳими эҳтирос, кўзда ва қалбда олов бўлиши, улар ҳар дақиқада кўрсатилиши керак.
Ўтган мавсумга нисбатан кучлироқ бўлишимиз керак эди. Аммо сиз бирдам бўлмасангиз, ҳамма нарса юз бериши мумкин. Бугун биз мисолларнинг фақат охиргисини кўрдик. Англия Кубогида «Шеффилд»нинг ёш болаларига мағлуб бўлганимизни унутманг. Бизда кучли таркиб бор эди, лекин мусобақадан чиқариб юборишди.
Жамоа, яхлит бир бутун бўлиши — энг муҳими. Мен фақат ўзи учун ўйнайдиган 11 футболчини кўряпман. Қўйинг. Шу билан тугатайлик. Биз профессионалмиз. Клуб бизга катта пул тўлайди. Бу пуллар ўйинчиларга баҳона қилиш ёки жавобгарликни ўз зиммасига олмаслик учун берилмайди. Фаолиятимда биринчи марта бундай вазиятдаман ва ўтган мавсум билан солиштирганда ҳаммаси ёмонлашди.
Нега? Чунки бу клубда футболчилар шунга кўниккан. Ҳа, улар жиддий соврин учун курашмаяпти. Улар бу ерда босим остида ўйнашни хоҳлашмайди ва осон йўлдан боришади. «Тоттенҳэм» тарихи шундай. 20 йил давомида бу хўжайин қўл остида клуб ҳеч нарса ютмаган — нега? Айб фақат клубдами ёки бу ерда ишлаган ҳар бир мураббийдами?
Мен жамоани қандай одамлар бошқарганини кўрдим. Мураббийларни камситиб, бошқа томонни кўрмаяпсиз. Бугунгача ундан қочишга ҳаракат қилдим, лекин кўрганларимни қабул қилиш мумкин эмас, айниқса, мухлислар учун. Улар бизни қўллаб-қувватлашади, чипталар учун пул тўлашади ва жамоа эса ўйинни осонликча бой беради. Бу ҳақда жиддий ўйлаб кўриш керак. Олдинда яна 10та ўйин бор ва одамлар бизни рақобатлашишимизни кутишмоқда. Аммо бундай жамоавий руҳ билан, ишга муносабат билан нимага курашиш мумкин? 7, 8, 10-ўринлар учунми? Мен бунга ўрганмаганман.
Хафаман. Ҳар ким масъулиятни ўз зиммасига олиши керак. Нафақат клуб, балки мураббийлар, штаб-квартира. Ўйинчилар ҳам буни қилишлари керак. Агар улар вазиятни аввалгидек сақлаб қолишни истасалар, мураббийларни алмаштиришлари мумкин. Мураббийлар ҳар доим ўзгариши мумкин, аммо вазият эмас. Ишонаверинг», — дея Контенинг сўзларини келтиради Football London.