Суперлига 3-тури доирасидаги «Пахтакор» - «Навбаҳор» (2:1) учрашувида «Пахтакор» стадионидаги меҳмон жамоа мухлислари секторида бир неча ўриндиқлар синдирилган.

Клубнинг ижтимоий тармоқлардаги саҳифаларида эълон қилинган суратлардан маълум бўлишича, «Навбаҳор» мухлислари бир нечта ўриндиқни синдириб ташлагани кўринган.

Тошкент жамоаси бу ҳолатга эътибор қаратиб, «Кечаги ўйиндан кейин меҳмонлар трибунаси: Стадионда нима айб? Пенальтини биз тепмадик-ку!», - дея суратларга изоҳ берган.

Қайд этиш жоиз, «Пахтакор» - «Навбаҳор» ўйинининг иккинчи бўлимида меҳмон жамоа сектори томондан ўйингоҳга турли буюмлар улоқтирилган, бунга жавобан «Пахтакор» ҳимоячиси Шаҳзод Азмиддинов меҳмон мухлисларга тош отганди. ПФЛ бу вазиятни қандай баҳолаши ҳозирча номаълум.

Эслатиб ўтамиз, ушбу баҳсда бош ҳакам Вадим Агишев мезбонлар дарвозасига икки пенальти белгилаб, наманганликлар ҳимоячиси Даврон Ҳошимовни майдондан четлатди.