Френки де Йонг ушбу мавсум «Барселона» учун ажойиб бўлиши мумкинлигини айтди.

«Агар Испанияда 3та совринни қўлга киритсак, бу ажойиб мавсум ҳисобланади. Чунки биз «Реал» ва «Атлетико» каби кучли жамоаларни ортда қолдирган бўламиз.

Лекин еврокубокларда «Барса» анча яхшиланиши керак ва буни биламиз.

Чемпионлар Лигасида анча олдинга боришимизни кутгандим, аммо охирги икки йил даҳшатли ўтди — гуруҳдан чиқа олмадик ва Европа Лигасидан ҳам тушиб кетдик. Кўпроқ ҳаракат қилишимиз керак.

Бу бизнинг айбимиз эканини биламиз ва келгуси йил натижа яхшироқ бўлишига умид қиламиз», — дея каталонияликлар яримҳимоячисининг сўзларини келтиради La Vanguardia. 

Маълумот учун, «Барса» бу мавсумда Испания Суперкубогини қўлга киритди, Ла Лигада 9 очколик фарқ билан пешқадамлик қилмоқда, Испания Кубоги яримфиналида биринчи ўйинида «Реал»ни (1:0) мағлуб этди.