«Барселона», «Реал» ва «Ювентус» Европа Суперлигасини қайтадан шакллантириш устида ишламоқда.

Бугун, 9 февраль куни Европа Суперлигаси бош директори Бернд Райхарт ташкилотчи-клублар турнирнинг янгича формат лойиҳасини йўлга қўймоқчи эканинини эълон қилди.

Янги лойиҳа молиявий муаммоларга дуч келган Европанинг 50дан ортиқ клублари билан ўтказилган музокаралар натижасида пайдо бўлган. Охирги ойлар давомида А22 ва Европа Суперлигаси АПЛ клубларининг молиявий устунлиги ва бу кўҳна қитъанинг бошқа чемпионатларига таъсири ҳақида кўплаб чиқишлар қилаётган эди. 

Европа Суперлигасининг янги талқинида доимий аъзоларсиз 60дан 80тагача иштирокчи клублардан иборат бир нечта дивизионлар бўлади. Ҳар бир иштирокчи клуб бир мавсумда камида 14тадан ўйин ўтказади. Ҳозирча клублар дивизионларга қайси асосда тақсимланиши ҳақида маълум қилинмаган. Жамоаларнинг мусобақани тарк этиши ҳам қандай тизимда бўлиши ҳали аниқ эмас.

Қайд этилишича, «Реал», «Барселона» ва «Ювентус» ҳозирча Европа Суперлигаси янги формати ҳақида сир сақламоқда.

Эслатиб ўтамиз, ушбу лойиҳанинг 2021 йилда йўлга қўйиш дастлабки уриниши омадсиз чиққанди. «Манчестер Юнайтед», «Манчестер Сити», «Ливерпуль», «Челси», «Арсенал», «Тоттенҳэм», «Барселона», «Реал», «Атлетико», «Ювентус», «Интер» ва «Милан» турнир ташкилотчилари сифатида қайд этилган бўлса-да, мухлислар ва УЕФА норозилигидан кейин дастлаб инглиз клублари лойиҳадан чиққани ҳақида эълон қилганди.

Охир-оқибат «Реал», «Барселона» ва «Ювентус» Суперлига лойиҳаси бўйича УЕФА билан қарийб 2 йил судлашгач, Мадрид суди ўтган ойда Европа футбол иттифоқи янги лойиҳага қарши чиқишга ҳақли эмаслигига ҳукм чиқарган эди.