«Рома» ҳужумкор яримҳимоячиси Николо Дзаньоло фаолиятини Туркия Суперлигасида давом эттирадиган бўлди.

Инсайдер Фабрицио Романонинг ёзишича, италиялик футболчи «Галатасарой» клуби билан келишувга эришгач, «Рома» футболчисини сотишга рози бўлди. Дзаньоло Истанбул клуби билан йиллик 3,5 миллион евро маошли 2027 йилга қадар белгиланган шартномага имзо чекади. Турк клуби 23 ёшли футболчи учун «Рома»га 20 миллион евро тўлайди. Истанбулликлар келишувда Николонинг товон пулини 35 млн евро қилиб белгилайди.

Қайд этилишича, Дзаньоло бугун, 7 февраль куни Римдан Истанбулга етиб келади. Тиббий текширувдан бугун ўтади.

Эслатиб ўтамиз, Рим клуби Дзаньолони қишки трансфер ойнасида қўйиб юбормагани сабабли футболчи жамоа машғулотларида иштирок этмаётган эди. Футболчига «Милан», «Ливерпуль» ва «Борнмут» клублари қизиқиш билдираётган эди. Рим клуби Николони «Борнмут»га 30 млн еврога сотишни режа қилган бўлса-да, футболчи бу жамоага ўтмаслигини маълум қилган эди.