Поль Погбанинг «Ювентус»даги кейинги тақдири сўроқ остида. Клуб раҳбарияти, мураббийлар штаби ва мухлислар франциялик яримҳимоячининг ярим йилдан буён сафга қайтмаётганидан норози.

29 ёшли яримҳимоячи 2022 йилнинг ёзида «МЮ»ни тарк этиб, эркин агент сифатида «Ювентус»га қайтгач, АҚШдаги турнеда тиззасидан олган жароҳати сабабли қарийб икки ойга сафдан чиққани маълум қилинганди. Аммо Полнинг сафга қайтиши қарийб 7 ойдан буён чўзилмоқда ва у ҳали ҳам туринликлар сафида расмий ўйинда майдонга тушганича йўқ.

La Gazzetta dello Sport хабарига кўра, «Ювентус» раҳбарияти жамоанинг энг катта маош оладиган футболчиларидан бирининг қайтганидан буён расмий ўйинда майдонга тушмаётганидан норози бўлмоқда. Клуб футболчи билан келишувни бекор қилиш варианти ёки уни ёзда нисбатан кучсизроқ лигаларга трансфер қилиш масаласини кўриб чиқмоқчи. Туринликлар Погбадек юқори маошли ўйинчига Европадан таклиф бўлмаслигини тушунмоқда, аммо номдор футболчига Америка, Қатар, Саудия Арабистони, БААдан таклиф бўлишига ишонмоқда.

Қайд этилишича, 27 ўйиндан буён «Юве»га ёрдам бермаётган Погбанинг ижтимоий тармоқлардаги фаоллиги туринлик мухлисларни ғазаблантирмоқда. Полнинг Франция сафида ЖЧ-2022да иштирок этиш мақсади сабаб ўз вақтида жарроҳлик амалиётини ўтказмагани ва клубдаги фаолиятини иккинчи даражада кўргани ҳам «Юве» ишқибозлари норозилигига сабаб бўлган. 

«Ювентус» ҳам Погбани кутишдан чарчаган – футболчи жароҳатини даволаш учун кўп вақтни Дубайда ўтказгани унга ёрдам бермаган. Раҳбарият Погба билан шартнома имзолаш учун қарийб 35 млн евро ажратганидан афсусда. Поль 4 йиллик шартномасига кўра, йиллик 7,5 млн евро маош олади. 

Аввалроқ, 29 ёшли яримҳимоячи жамоа машғулотларига қайтгани ва тез орада расмий ўйинда дебют қилиши мумкинлиги ҳақида хабар қилинганди.