Ўзбекистонлик шахматчиларнинг сўнгги бир йил давомида халқаро ареналардаги сенсацион ғалабалари ортидан Ўзбекистон – йилнинг энг яхши шахмат мамлакати деб эътироф этилди.
Хусусан, ўтган икки ҳафта давомида Нидерландияда ўтказилган «Tata Steel Chess-2023» халқаро турнирининг «Masters» тоифасида Ўзбекистон миллий жамоаси аъзоларидан Нодирбек Абдусатторов 5-турдан буён пешқадамликни ҳеч кимга бермай, сўнгги турдаги ягона мағлубияти сабабли якунда 2-ўринни эгаллаган бўлса, «Challengers» таснифида ўзбекистонлик яна бир шахматчи Жавоҳир Синдоров 3-ўринни эгаллади.
Нидерландиядаги халқаро турнир якунида Нодирбек Абдусатторов ва Жавоҳир Синдоров йилнинг энг яхши шахмат мамлакатига топшириладиган «Tour D'or» - «Олтин минора» совринини қабул қилиб олишди. Ўзбекистон шахмат федерациясига Европанинг шахмат совринини франциялик машҳур гроссмейстер Башар Куатли топширди.
🥇🇺🇿 L'Ouzbékistan a remporté la Tour d'or, Trophée Europe Échecs qui récompense le meilleur pays échiquéen de l'année !
— Europe Echecs (@EuropeEchecs) January 31, 2023
Bachar Kouatly a remis cette récompense à Nodirbek Abdusattorov @NodirbekGM et Javokhir Sindarov lors du #TataSteelChess.
📸 ©️Maaike Brink pic.twitter.com/z5eD7yYwmx
Шунингдек, «Tata Steel Chess-2023» мусобақасида Нодирбек Абдусатторовга мағлубиятга учраган норвеглиялик Магнус Карлсен 2022 йилнинг энг яхши шахматчиси деб топилди. Ҳиндистонлик Доммаражу Гукеш эса 2022 йилнинг энг яхши ёш шахматчиси деб эълон қилинди. У 2022 йилги шахмат Олимпиадасида Нодирбек Абдусатторовга мағлубиятга учраганди. Ҳар икки шахматчи «Tour D'or» совринларига эга чиқди.
Эслатиб ўтамиз, 2022 йилда Ҳиндистоннинг Ченнай шаҳрида бўлиб ўтган 44-Бутунжаҳон шахмат Олимпиадасида Ўзбекистон бирорта ҳам мағлубиятга учрамаган ягона жамоа бўлиб, 188 жамоа иштирок этган Олимпиада чемпионига айланганди. Натижада, илк марта ўзбекистонлик 4 шахматчи FIDE рейтингида ТОП-100таликдан жой олганди.