Криштиану Роналду ўз вақтида «Манчестер Сити»га ўтмагани сабаби маълум бўлди. 

2021 йил ёзида «шаҳарликлар» ўша пайтда «Ювентус»да тўп тепаётган ҳужумчини ўз сафига қўшиб олишга қизиқиш билдиришган. Бироқ якунда португалиялик «Манчестер Юнайтед»га ўтганди. 

El Mundo'нинг хабар беришича, «Ман Сити» бош мураббийи Пеп Гвардиола Роналдунинг ўтишига қаршилик билдирмаган. Шу билан бирга клуб икки ҳужумчи кетган тақдирдагина Криштиану билан шартнома имзолашга тайёр эди. 

Ўша ёзда «шаҳарликлар» ҳужумчиси Серхио Агуэро «Барселона» билан шартнома имзолаган. Раҳим Стерлинг ҳам Каталония клубига ўтишга яқин эди, бироқ томонлар шартнома шартлари бўйича келиша олишмаган. Бу эса Роналдунинг «Сити»га ўтиши муваффақиятсизликка учрашига сабаб бўлган. 

Эслатиб ўтамиз, ўтган йилнинг охирида 37 ёшли форвард «МЮ» билан шартномани бекор қилиб, Саудиянинг «Ан Наср» клуби сафига қўшилди.