«Ювентус»нинг бир қатор собиқ раҳбарлари клубнинг молиявий қаллобликлари сабабли футболдан четлатилди.

Италия футбол федерацияси суди «Ювентус»ни молиявий қаллобликларда айблаб, клубни А Серияда 15 очкодан маҳрум этгач, тергов жараёнида истеъфога чиққан Турин клубининг бир қатор раҳбарларига ҳам жазо чоралари эълон қилинди.

Жумладан, клуб собиқ президенти Андреа Аньелли ва собиқ бош директори Маурицио Арривабене 2 йилга футболдан четлатилди. Собиқ вице-президент Павел Недвед 8 ойга, ҳозирда «Тоттенҳэм» спорт директори сифатида ишлаётган, аввал туринликлар спорт директори саналган Фабио Паратичи 2,5 йилга, ҳозирги спорт директор Федерико Керубини эса 4 ойга футболдан дисквалификация қилинди. Суд ушбу мутахассисларнинг УЕФА ва ФИФА шафелигидаги турнирларда ҳам ишламаслигини сўраб, ташкилотларга мурожаат қилган.

Аввалроқ, Турин клуби суднинг жамоани 15 очкодан маҳрум этгани борасидаги қарорига апелляция бериши мумкинлиги ҳақида хабар қилинганди. «Юве» 3-ўриндан 10-поғонага пастлади.