Ўрганиш натижасига кўра интернетда тарқалган туғилганлик ҳақидаги гувоҳнома монтаж маҳсулидир.

Ижтимоий тармоқларда Жиззах вилоятининг Бахмал туманида туғилган болага “MBAPPE” деб исм қўйилганлиги ҳақида хабар тарқалди. Хабарга боланинг туғилганлик ҳақидаги гувоҳномаси илова қилинган.

Ҳужжатга кўра, бола 2023 йилнинг 14 январ куни дунёга келган. Туғилганлик ҳолати Бахмал тумани ФҲДЁ бўлими томонидан 16 январь куни қайд этилган.

Kun.uz бу хабар қанчалик ҳақиқатга яқин эканини билиш мақсадида Адлия вазирлигининг ахборот хизмати билан боғланди. Вазирлик томонидан ушбу ҳолат ўрганиб чиқилганда, интернетда тарқатилган хабар ёлғон экани, болага бундай исм қўйилмагани аниқланди.

Адлия вазирининг матбуот котиби Севара Ўринбоевага кўра, ижтимоий тармоқда тарқалган ҳужжат фотошоп маҳсули бўлиб, аслида болага Абдуллоҳ деб исм қўйилган. Мутахассисларга кўра, буни туғилганлик ҳақидаги гувоҳнома рақами ёхуд ҳужжатда қайд этилган жисмоний шахснинг шахсий идентификацион рақамидан ҳам осонгина аниқлаш мумкин.

“Маълумот тариқасида, болага исм унинг келгусидаги манфаатларидан келиб чиққан ҳолда берилади, келгусида унинг шаъни ва қадрига салбий таъсир қилиши мумкин бўлган исм берилишига йўл қўйилмайди”, дейилади Адлия вазирлигининг Kun.uz’га тақдим этган маълумотида.

Эслатиб ўтамиз, Мбаппе футбол бўйича Франция терма жамоасининг аъзоси Килианнинг фамилиясидир.

Ўзбекистонликлар ўз фарзандига футбол юлдузи, кино қаҳрамон ёки тарихий шахсларнинг исмини қўйгани бунгача ҳам кузатилган. Интернетда 1984 йилда туғилган Чингалчук, 1990 йилда таваллуд топган Брус Ли, 1993 йили дунёга келган Амир Темур, 1994 йилда туғилган Марадоналарнинг ҳужжатлари нусхаси мавжуд.