«Наполи» бош мураббийи Лучано Спалетти А Серия 18-туридан ўрин олган «Ювентус»га (5:1) қарши ўйиндан сўнг ўз фикрлари билан ўртоқлашди. 

«Жамоа жуда юқори суръатда ажойиб ўйин кўрсатди — шундай қилишимиз керак эди. 

Гўзал оқшом, мухлислар ажойиб қўллаб-қувватлашди, жамоа уларга «Наполи» ранглари ва футболига бўлган меҳри билан жавоб берди.

Ўйин давомида ўзимизни тўғри тутдик, ҳатто «Ювентус»нинг голидан кейин ҳам. 

Агар улар билан яккакурашларга киришга ҳаракат қилсак, ютқазардик, чунки бу бизнинг табиатимизда йўқ. Тўп билан ўйнашимиз керак. Бу — бизнинг ДНКимиз. 

Осимҳеннинг ҳали тўлиқ шаклланмаган салоҳиятдан ҳайратдаман, у ҳаммадан кучли.

5:1 ҳисобидаги ғалаба, аввало, ўзимиз учун хабар. «Ювентус»дан ҳаммамиз бироз чўчирдик, чунки бу жамоага қарши ўйнаганингизда гўёки колоссга (гигант) дуч келасиз. Аммо қойилмақом ўйин ўтказдик ва ғалабага ҳақли эдик», — дея Спалеттининг сўзларини келтиради DAZN.

Неаполь клуби Италия чемпионатида 47 очко билан пешқадамлик қилмоқда ва энг яқин таъқибчилари «Милан» (37, бир ўйини кам) ҳамда «Ювентус»ни (37) 10 очкога ортда қолдирмоқда.