Португалия собиқ бош мураббийи Паулу Бенту миллий жамоанинг Криштиану Роналдуга аввалгидек боғланиб қолмаганини айтиб ўтди.

«ЖЧ-2022да менга яққол кўринган жиҳат миллий жамоанинг Криштиану Роналдуга аввалгидек боғланиб қолмагани бўлди. Аввал у майдонга тушган ва у таркибда бўлмаган Португалия – икки хил жамоа эди. Ҳозирда эса вазият ўзгарди ва жамоа Роналдуга таяниб қолмаган. 

Роналду – мен фаолиятим давомида бошқарган энг яхши ўйинчи. Унинг мамлакатимизга ва португал футболига келтирган натижа ва ютуқларини ҳеч ким инкор эта олмайди. Аммо барибир, барча нарсанинг якуни бўлади. Ким қандай ва қачон якунлашни фақатгина ўзи ҳал қилади», - дейди Португалия миллий жамоаси собиқ бош мураббийи Паулу Бенту.

Эслатиб ўтамиз, Пауло Бенту ЖЧ-2022дан кейин Жанубий Корея миллий жамоаси бош мураббийлигидан истеъфога чиқди. У Португалиядан истеъфога чиқарилган бош мураббий Фернандо Сантуш ўрнини эгаллаш учун номзодлардан бири бўлиб турибди.

Аввалроқ, 37 ёшли Роналду ҳали миллий жамоа билан хайрлашишни ўйламаётгани, у Евро-2024да қатнашишни режалаштираётгани ҳақида хабарлар тарқалганди.