«Ан-Наср» бош мураббийи Руди Гарсия Криштиану Роналдунинг устозига айланиши мумкинлиги ҳақидаги саволга жавоб қайтарди.

«ЖЧ-2022да Роналдуни қандай эслаб қолдим? Криштианунинг Марокашга қарши мағлубиятли ўйиндан кейин кўзда ёш билан кийиниш хонасига йўл олгани акс этган сўнгги кадрлар таъсирли ва ёдда қоларли бўлди. 

Фикримча, исталган мураббий Роналду сингари буюк футболчини ўз жамоасида кўриш, у билан ишлашни орзу қилади. Биласизми, 2021 йилнинг ноябрида мен бунга яқин эдим. Чунки ўшанда «Манчестер Юнайтед»ни бошқаришга жуда яқин бўлгандим. Аммо якунда улар Ральф Рангникни танлашганди. Ўшанда «МЮ» раҳбариятидан Жон Мерто ва Даррен Флетчер билан икки марта учрашиб, гаплашиб олгандик. «МЮ»дек буюк жамоани бошқаришим мумкинлигидан бошим осмонда эди. Аммо Роналду ва «МЮ» билан ишлаш насиб қилмаганди», - дейди 58 ёшли франциялик мураббий.

Аввалроқ, Ар-Риёд клуби Роналдуга расмий таклиф билан чиққан ягона клуб бўлиб тургани хабар қилинганди. 37 ёшли португалиялик ҳужумчи ЖЧ-2022ни чоракфиналда якунлагач, ҳали ҳам эркин агент сифатида клубсиз саналади.