Хорватиялик ҳакам Бруно Марич ЖЧ-2022 яримфиналини бошқарган Даниэле Орсатони пенальти белгилагани учун танқид қилди. 

Турнирнинг 1/2 финали доирасидаги Аргентина-Хорватия (3:0) баҳсида биринчи тўп пенальтидан киритилди. Доминик Ливакович ўз жарима майдончаси ичида ҳужумчи Хулиан Альваресни йиқитгани учун 11 метрлик жарима зарбаси белгиланди ва уни Лионель Месси голга айлантирди. 

«Фитнага ишонадиганлардан эмасман, лекин айтишим керакки, Пепенинг гапида жон бор: кўп нарса Аргентина фойдасига ишламоқда. 

32-дақиқада ҳакамнинг қарори мени шундай ўйлашга мажбур қилмоқда. Пенальти йўқ эди. Ливакович қўполлик қилмади. Бу ерда фақат дарвозабонга нисбатан қоидабузарликни кўриш мумкин эди. Афсуски, Орсато ақл бовар қилмайдиган қарор қабул қилди. 

Натижага бевосита таъсир кўрсатадиган, адолатсиз ва қабул қилиб бўлмайдиган қарор!» — деди Марич.

Португалия миллий жамоаси 1/4 финалда Марокашга (0:1) ютқазиб турнирни тарк этгач, португаллар ҳимоячиси Пепе баҳсни бошқарган аргентиналик ҳакамни танқид қилган ва бу мундиалда Аргентинани чемпион қилишмоқчи эканлигини айтганди.