Турин прокуратураси «Ювентус» клубидаги молиявий фирибгарлик юзасидан текширув бошлади.
Жаҳон чемпионати давом этаётган паллада Италияда юз берган шов-шувли можаро футбол ҳамжамияти эътиборидан бироз четда қолди. 29 ноябрь куни «Ювентус» клубининг кўп йиллик президенти Андреа Аньелли ва унинг ўринбосари Павел Недвед бошчилигидаги директорлар кенгаши истеъфога чиқди. Бу нафақат «Кекса синьора» мухлислари учун, балки футбол оламининг барча вакиллари учун кутилмаган ҳодиса бўлди. Чунки, сўнгги йилларда «Ювентус» қўлга киритган кўплаб ютуқлар айнан Аньелли ва унинг жамоаси билан боғлиқ эди.
30 ноябрь куни барчаси ойдинлашди. Турин прокуратураси «Ювентус» клубидаги молиявий фирибгарлик юзасидан текширув бошлаганини эълон қилди. Аньелли ва директорлар кенгашининг истеъфоси айнан шу жараён билан боғлиқ эди.
«Ювентус» клуби раҳбарияти барча айбловларни рад қилди ва ҳар доим қонун ва бухгалтерия тамойилларига, шунингдек, халқаро футбол индустрияси амалиёти ва бозор шароитларига мувофиқ ҳаракат қилганини таъкидлади.
«Ювентус» клубидаги молиявий фирибгарликлар ҳақида нималар маълум
30 ноябр куни Турин прокуратураси Аньелли ва клуб раҳбариятининг бошқа аъзолари молиявий фирибгарлиги юзасидан текширув бошлади. Шу куни УЕФА ҳам клубни молиявий фэйр-плейни бузганликда гумон қилиб, суриштирув ўтказилишини эълон қилди.
Турин клуби раҳбарияти нотўғри молиявий маълумотларни тақдим этганликда, футболчиларнинг трансфер нархини сохталаштирган ёки ошириб юборганликда, бозорни манипуляция қилганликда ва сохта ҳисобот тақдим этганликда, бу билан аудиторлик назоратига халақит берганликда гумонланмоқда.
Ўтган мавсум якунига кўра, «Ювентус» клубининг молиявий зарари рекорд даражадаги 254,3 миллион еврони ташкил қилган. Катта эҳтимол билан, текширувлар 2022/23 мавсуми якунига қадар давом этади.
Турин прокуратураси асосий эътиборни «Ювентус»нинг 2019, 2020 ва 2021 йиллардаги молиявий натижаларига қаратмоқда. Ҳужжатлар ўрганиб чиқилганидан сўнг, терговчилар сезиларли фарқларни аниқлаган.
Клубнинг пандемия даврида футболчилар билан тузган келишувлари ҳам шубҳа остига олинган. «Ювентус» клуби раҳбарияти 2020 йил март ойида баёнот бериб, футболчилар март, апрел, май ва июн ойлари учун мўлжалланган маошидан воз кечишга рози бўлганини, бу билан 90 млн евро тежалганини маълум қилган эди. Аммо терговчилар фикрига кўра, футболчилар фақат бир ойлик маошдан воз кечган, клуб эса ёлғон баёноти билан молиявий бозорни чалғитган.
La Gazzetta dello Sport хабарига кўра, 2020 йилдаги коронавирус пандемияси даврида «Ювентус» футболчилардан 4 ойлик маошдан воз кечишни таклиф қилган. Бироқ, футболчилар бунга рози бўлмаган. Шундан сўнг, клуб 1 ойлик маошдан воз кечиш, 3 ойлик маошни кечиктириш таклифини берган. Баъзи футболчилар бунга рози бўлган. Аммо клуб раҳбарияти матбуотда футболчилар 4 ойлик маошдан воз кечганини эълон қилган. Пауло Дибала, Маттейс де Лигт, Маттиа де Шильо, Мерих Демирал ва бошқалар бу ҳақда прокуратурага кўрсатма берган.
Прокуратура фикрига кўра, «Ювентус» бу «фириб»ни молиявий ҳисоботларни «тартибга келтириш» учун қилган.
La Stampa хабарига кўра, «Ювентус»нинг уч нафар футболчиси «конвертда пул олиш»ни истамаган ва клубни тарк этган: Альваро Мората, Маттейс де Лигт ва Жанлуижи Буффон. Аргентиналик ҳужумчи Пауло Дибала ҳам бундай битимни имзолашни истамагани, аммо шартномани узайтириш илинжида бунга қўл урганини айтган.
Роналду билан махфий келишув
La Gazzetta dello Sport хабарига кўра, «Ювентус» клуби ҳужумчи Криштиану Роналду билан пандемия давридаги маошини кечиктириш ҳақида оғзаки келишувга эришган. Гап 20 миллион евро ҳақида кетмоқда. «Ювентус» бу қийматни молиявий ҳисоботга киритмаган. Бу ҳақда Роналду адвокатлари томонидан судга тақдим қилинган даъво аризасидан кейин маълум бўлган. Криштиану ўзига ваъда қилинган пул маблағларини ундириб беришни сўраган, бироқ, судья оғзаки келишувлар ҳуқуқий майдонда кўриб чиқилмаслигини маълум қилиб, даъвони рад этган.
Тергов маълумотларига кўра, 2018 йилдан 2020 йилгача «Ювентус» молиявий ҳисоботларни сохталаштириб, капитал ўсиш миқдорини сунъий равишда 115 миллион еврога оширган. Бу фонд биржасида акциялар нархининг пасайиб кетишини олдини олиш ва акциялар савдосини давом эттириш мақсададида қилинган.
«Ювентус»ни нима кутмоқда
Агар молиявий фирибгарликлар тасдиғини топса, «Ювентус» Италия чемпионатининг юқори дивизиони бўлган А Сериядан четлатилиши ва Б Серияга тушириб юборилиши мумкин.
Бу ҳақда спорт ҳуқуқшуноси Маттиа Грассани маълум қилди.
«Бу «Ювентус» клуби ҳозиргача дуч келган энг жиддий терговдир. Балки 2006 йилдаги Кальчополидан ҳам жиддийроқ бўлиши мумкин. Ноқонуний ҳаракатлар фонд бозори қоидалари, шунингдек, корпоратив ва спорт қоидаларини қамраб олади. Бу мисли кўрилмаган ҳодиса. «Ювентус»га нафақат жарима ва жазо хавф солмоқда, қонунга кўра, клуб А Сериядан тушириб юборилиши ва Италия чемпиони унвонларини йўқотиши мумкин. Бу ҳозирги шароитда мутлақо реал воқеадир.
Қоидага кўра, ҳужжатларга ўзгартириш киритиш, футболчиларга тегишли тўловларни кечиктириш ёки бекор қилиш тўғрисидаги шахсий келишувлар, ҳатто бундай келишувлар сохта бўлган тақдирда ҳам клуб чемпионатдан четлатилиши ва чемпионлик унвонларидан маҳрум бўлиши мумкин», деб ҳуқуқшунос сўзларини келтирди La Repubblica.
Биринчи марта эмас
Худди шунга ўхшаш ҳолат «Ювентус» билан аввал ҳам содир бўлган. 2006 йилда улар йирик коррупция можаросига аралашиб қолган, «Кекса синьора» ва бошқа бир қанча клублар ўйинларни сотиб олишда айбдор деб топилган эди. Шундан сўнг, асосий айбдор сифатида «Ювентус» чемпионликдан маҳрум қилиниб, Б Серияга тушириб юборилди.
Нурмуҳаммад Саид