Турли кўрсаткичлар бўйича чуқур таҳлиллар натижасида аниқланишича, Қатар миллий жамоаси таркиби ЖЧ-2022даги энг кучсизи экан. Бунга қўшиламан, шунинг учун ҳам турли тармоқ ва сайтларда қатарлик футболчилар устидан танқидий фикрлар бироз ошириб юборилган деб ўйлайман. Нима ҳам кутгандик ўзи?

Ҳа, мезбонлар аслида бундан кучлироқ ўйин, яхшироқ натижага эришишлари мумкинмиди? Балким. Масалан, бугунги Қатардан ҳам кучсизроқ Янги Зеландия 2010 йилги мундиални мағлубиятсиз тарк этган. Бунақа мисоллар тарихдан кўп топилади. Лекин битта фарқ бор. 

Янги Зеландия ҳам, бошқа аутсайдерлар ҳам, услубан, тактик тайёргарлик ва танланган стратегия бўйича аутсайдерларга хос эдилар. Яъни, бутун жамоа бўлиб ҳимояга эътибор қаратиш, аввало ўз жарима майдони яқинида хато қилмаслик, ана ундан кейин имконият туғилганда рақиб майдонида омад излаш. Қийин, лекин таркиб сифати агар рақибдан пастроқ бўлса, бошқа йўл ҳам йўқ. 

Қатар бу турнирга анчадан бери тайёрланмоқда, икки ойдан бери чемпионат тўхтатилиб, йиғин ўтказишяпти, Ла Масиядан вакиллар шуғулланяпти, таркиб «Ас-Саад» клуби футболчилари асосида қурилган. Ўша Хави пойдевор қўйган, унинг услубида ўйнайдиган «Ас-Саад» асосида. Табиийки, бу бироз бошқача – юқори прессинг, тўп билан муомала, майда ва ўрта паслар талаб қилинадиган пойдевор, зинҳор «аутсайдерча» услуб эмас. Бу билан ўртоқлик ўйинларида кўзга ёқимли футбол намойиш этиш, ҳатто Осиё кубогини ютиш ҳам мумкин, лекин...

Футболчиларга қачон, қаерда туриш, қаерга тўпни ошириш, ҳужумни қандай ривожлантириш, қаерга ким югуриши, ҳаммаси мукаммал даражада ўргатилганига шубҳам йўқ. Буни қатарлик футболчилар билади, ишонинг. Аммо қаршилик савияси бироз ошганда, айтайлик, Эквадор даражасига чиққанда, энди бироз импровизация, бошқача айтганда, маҳорат ҳам талаб этилади. Босим остида ўйнаш, рақиб сифатлироқ прессинг уюштирганда тез фикрлаш, тўғри вариант танлаш, вақти келганда дриблинг, умуман тўпни ўйланган манзилга бехато етказиб бериш лозим бўлганда, энди футболчилардан юқорироқ маҳорат талаб қилинади. Ана шу маҳоратни маълум даражагача машғулотлар ва вақт ёрдамида кўтариш мумкин, лекин фақат маълум даражагача. Ўша даража Эквадордан паст бўлса, нимаям қила олишарди? Ҳатто Пеп Гвардиолани дунёдаги энг зўр футболни қуради, деб мақтаганимиз билан, у ҳам ҳар бир чизиқда, ҳатто захира ўриндиғида ҳам камида 50 миллион нархдаги футболчиларга эҳтиёж сезади-ку?

Қатар соддароқ йўлни танласа, масалан, «Манчестер Сити» эмас, «Бёрнли» эканини ҳис қилса, энди бироз бошқачароқ футбол ўйнашни бошласа, балким, кейинги ўйинларда мазмун кўрармиз, қандайдир очколар қўлга киритилар, бу энди бошқа ҳикоя. 

Албатта, дастлабки ўйиндаёқ ҳар жабҳада мағлубиятга учраш майдон эгалари учун хунук натижа, тарихда ҳам биринчи марта бўлмоқда. Лекин Қатардан мазкур турнирни олий даражада ташкиллаштириб беришни кутишимиз мантиқлироқ, айнан шу вазифа ушбу мамлакат учун биринчи рақамли приоритет. Терма жамоанинг иштироки эса шунчаки, ҳеч қачон мундиалда ўйнамаган давлат учун қўшимча бонус холос. 

Қаҳрамон Асланов