Қатар жаҳон чемпионатини ўзида ўтказиш учун жуда кўп пул сарфлади. Шунчалик купки ҳатто мусобақадан кейин бузиб ташланадиган вақтинча стадион ҳам қурди.

Ҳа, Месси, Роналду, Мане, Левандовский каби топ футболчилар ЖЧ вақтида мусобақадан кейин бузиб ташланадиган стадионда майдонга тушади. Денгиз бўйида жойлашган стадион 974 деб номланади. Бу номнинг икки хил маъноси бор: уни қуриш учун 974 дона денгиз контейнери ишлатилган (Қатар денгиз саноатини эслатиши учун), шунингдек, +974 Қатарнинг халқаро телефон коди ҳисобланади.

2021 йил 30 ноябрда қурилган стадион бир йилдан кейин бузиб ташланган ФИФА тарихидаги биринчи стадион ҳисобланади.

Унинг атрофида суратга тушиш учун турли хил жойлар қилиб қўйилган. Хусусан, мухлислар жаҳон чемпионати кубогининг макети олдида суратга тушишмоқда. Дарвоқе, Қатарда ҳали мухлислар жуда кам эканини айтиш керак. Стадионлар атрофида, метро ёки автобусларда ажиотажни учратиш қийин. Балки яшаш жуда қиммат бўлган Қатарга мухлислар ўйин куни ташриф буюришни афзал кўраётгандир.

Стадионнинг ичкарисидан суратга олишимизга рухсат беришмади. Ўйингоҳлар фақат ўйин кунлари очиларкан. Умуман олганда стадионлар атрофида чекловлар жуда кўп. Полиция хушмуомалик билан жуда кўп нарсалар мумкин эмаслигини тушунтириб қўяди.

Қатарда ҳозирча араблардан кўра ҳиндлар ва покистонликларни кўпроқ учратдик. Аэропортдаги ишчидан тортиб стадион атрофидаги қўриқчилар, метро ходимларигача ҳиндлар. Уларнинг деярли барчаси инглизчани билиши эса тақсинга сазовор. Масалан, инглиз тили машҳур экани айтиладиган Япония, Сингапур ёки Тайландда бу борада муаммога дуч келасиз. Қатарда эса сизга керак бўладиган деярли ҳамма инглизчани билади.

Ўткир Жалолхонов, Қатар.