2028 йилда Лос-Анжелес шаҳрида ўтказиладиган ёзги олимпия ўйинларида катта эҳтимол билан бокс бўлмайди. Халқаро Олимпия қўмитаси (ХОҚ) ҳозирча уни дастурга киритмади.

Ушбу спорт тури тарихи инобатга олинадиган бўлса, бу мисли кўрилмаган янгилик. Бокс биринчи марта 1904 йилги Сент-Луис олимпиадаси дастурига киритилган эди. Шундан бери Олимпиада кун тартибининг ажралмас қисмига айланди (1912 йилги Стокҳолм олимпиадасидан ташқари).

2022 йилга келиб, ХОҚ шов-шувли қарорни тасдиқлашга яқин турибди.

«Ҳозирча бокс 2028 йилда Лос-Анжелесда бўлиб ўтадиган Олимпия ўйинларининг дастурига киритилмаган. Ҳақиқий ўзгаришлар йўқлигини инобатга олиб, ХОҚ Ижро кенгаши бу қарорни бекор қилишга ожиз ва IBA фаолиятини жиддий ташвиш билан кузатишда давом этади», дейилади ХОҚ спорт директори Кит Макдоннелнинг Ҳаваскор бокс ассоциацияси (IBA) раҳбари Умар Кремлёв номига ёзган хатида.

ХОҚ боксни олимпиада дастуридан олиб ташлашга биринчи марта уринаётгани йўқ. Ўтмишда AIBA номи билан машҳур бўлган ташкилот энг коррупциялашган спорт федерацияларидан бири эди. Шубҳали ҳакамлик, очколарни ҳисоблаш тизими шаффоф эмаслиги ва катта турнирлардаги ҳакамлик билан боғлиқ жанжаллар оқибатида ХОҚ федерация раҳбариятини танқид қилиб келаётган эди. 

2019 йилда ХОҚ боксни олимпиада дастуридан олиб ташламоқчи бўлди. Бироқ, Умар Кремлёвнинг федерация раҳбарлигига сайланиши ва 10 миллион доллар миқдоридаги қарздорликнинг бартараф этилиши туфайли, бу қарор кечиктирилди.

Умар Кремлёв 2020 йил декабрь ойидан бери IBA раҳбари бўлиб ишламоқда. Олдин у Россия бокс федерациясига раислик қилган. Кремлёв IBA президенти бўлгач, янги Низомни қабул қилди, янги қўмиталарни тузди, вазн тоифалари сонини эркаклар учун 13 тага, аёллар учун 12 тага етказди, жаҳон чемпионати мукофот жамғармасини кўпайтирди, миллий федерацияларга молиявий ёрдам дастурини амалга оширди.

Бироқ, ХОҚ Кремлёвнинг Олимпия қўмитаси тавсияларини инобатга олмасдан туриб, ислоҳот ўтказаётганидан қониқмади. Бундан ташқари, федерациянинг санкциялар остида қолган «Газпром»га молиявий қарамлиги, ҳаваскор бокс бошқарув марказининг Лозаннадан Москвага кўчирилаётгани ҳам олимпия мулозимлари норозилигига сабаб бўлган.

Қўшимчасига, шу йилнинг май ойида IBA янги президенти сайлови бўлиб ўтиши керак эди. Аммо Кремлёвнинг ягона рақиби Борис ван дер Вурст сайловдан четлаштирилди. Оқибатда ХОҚ «сабр косаси тўлди».

Бокс олимпиада ўйинлари дастурига киритилишига ҳали умид бор. Лекин кун сайин у тобора заифлашиб бормоқда. Ташкилотчилар спорт ареналари қуриш бўйича иш бошлаши, ҳомийларни жалб қилиши учун олимпиада дастурининг тасдиқланган вариантига тезроқ эга бўлиши лозим. Ҳозирча ундан бокс жой олмаган.