«Манчестер Юнайтед» клуби жамоадаги футболчилар танловига кўра мавсумнинг энг яхши ўйинчисини эълон қилди.

Унга кўра, 2021/22 йилги мавсумнинг клубдаги энг яхши ўйинчиси дея жамоа дарвозабони Давид Де Хеа топилган. Жамоадаги футболчилар ўртасидаги сўровномада у Роналдудан кўпроқ овоз жамлаган. 

Қайд этиш жоиз, испаниялик дарвозабон жорий мавсум 7 марта учрашувнинг энг яхши ўйинчиси деб топилган бўлса, Криштиану Роналду ҳам шунча марта «Man of the match» совринига эга чиққан. Шунингдек, Де Хеа уч ой – ноябрь, декабрь ва январда ойнинг энг яхши футболчисига айланган.

Эслатиб ўтамиз, «МЮ» футболчилари клуб тарихида 4 марта Де Хеани йил ўйинчиси деб топишди. Бу – рекорд натижадир. Ҳозиргача уч ўйинчи - Криштиану Роналду (2006/07 ва 2007/08), Люк Шоу (2018/19 ва 2020/21) ҳамда Антонио Валенсия (2011/12 ва 2016/17) клуб тарихида икки мартадан энг яхши ўйинчи деб топилган.

Аввалроқ, клуб мухлислари талқинига кўра, Роналду мавсумнинг энг яхши ўйинчиси деб топилганди.