22.03.2022 16:35
25381
«Рома»да кўп вақтни захирада ўтказиш ниятим йўқ». Элдор Шомуродов захирада қолаётгани сабаби, Моуриньо билан муносабати ва Абраҳамнинг кетиши мумкинлиги ҳақида

«Navruz Cup-2022» турнири олдидан Ўзбекистон миллий жамоасининг Тошкентдаги йиғинига келиб қўшилган Элдор Шомуродов журналистлар билан суҳбатда «Рома»даги фаолиятига тўхталди.

- Элдор, кайфиятингиз қандай?
- Миллий жамоага келганимда кайфиятим ҳар доим аъло даражада бўлган.

- «Рома»даги ишларингиздан кўнглингиз унчалик тўлмаётган бўлса керак?
- Албатта. Кўпроқ ўйнашни хоҳлайман.

- Бунга нима тўсқинлик қилаяпти?
- Билмадим, балки ўзимни етарлича яхши кўрсата олмаётгандирман.

- Жозе Моуриньо билан муносабатингиз ёмонлашмаганми?
- Йўқ, ҳаммаси яхши. Яъни, ҳар доимгидек. Энди, жуда бошидагидек эмас-ку, лекин яхши. 

- Режангизда кейинги мавсумда ҳам «Рома»да қолиш борми?
- Шартномам бор. Агар, ўйнайдиган бўлсам, қолиш ниятим бор. Лекин кўп вақтни захирада ўтказиш ниятим ҳам йўқ. 

- Тэмми Абраҳамнинг Англияга қайтиши мумкинлиги ҳақида хабарлар янграмоқда. Унинг «Рома»дан кетмоқчи экани сизнинг қарорингизга таъсир қила оладими?
- Йўқ, бунинг аҳамияти йўқ деб ўйлайман, – дея Элдор Шомуродовнинг сўзларини келтирган Tribuna.uz мухбири.

Аввалроқ, Италия нашрлари «Рома» мавсум якунида Шомуродов билан хайрлашиши мумкинлиги ҳақида ёзишганди.

Маълумот учун, Ўзбекистон миллий жамоаси форварди жорий мавсум  А Серияда 21 ўйинда 2та голга муаллифлик қилган.

Турнир жадваллари
Жамоа
W D L Pts
Сўнгги янгиликлар
Долзарб хабарлар