Россия миллий жамоаси ҳамда «Зенит» клуби ҳужумчиси Артём Дзюба Украинадаги воқеалар юзасидан ўз фикрларини эълон қилди.

«Ҳар қандай урушга қаршиман. Уруш – бу даҳшат. Шу билан бирга инсонларга нисбатан ҳар қандай кўринишдаги тажовузкорлик ва нафратга қаршиман. 

Одамлар миллати сабабли камситилишига қаршиман. Рус эканлигимдан уялмайман, аксинча, шу миллатга мансуб эканимдан фахрланаман. Аммо ҳозирги вазиятдан нега спортчилар жабр чекиши кераклигини тушунмайман. 

Икки хил стандартларга қаршиман. Нега бировларга ҳамма нарса мумкин-у, бизни эса барча итларга талатишмоқчи. Ахир шунча пайт ҳамма спорт сиёсатдан ҳоли дея бонг урганди, бироқ бу масала Россия билан боғлиқ бўлганда, биринчи имкониятдаёқ нега бу тамойил бутунлай унутилди?», - дея Дзюбанинг сўзларини келтирган «РИА Новости».

Эслатиб ўтамиз, Россиянинг Украинадаги ҳарбий ҳаракатлари ортидан ФИФА ва УЕФА Россия миллий жамоалари ҳамда клубларини халқаро турнирлардан четлатган бўлса, МОҚ россиялик спортчиларни халқаро турнирларга таклиф этмаслик бўйича баёнот эълон қилганди.