Ўзбекистон миллий жамоаси ва Фарғонанинг «Нефтчи» клуби собиқ бош мураббийи Юрий Саркисян Tribuna.uz мухбири билан суҳбатда водий клубидаги 27 йиллик фаолиятидан кейин жамоани нега тарк этгани ҳақида гапирди.

«Нефтчи»дан кетиш сабабларимни айта олмайман. Ўзимга ортиқча душман орттиришни хоҳламайман. Нега кетганим ҳақида мендан кўп сўрашади (кулиб). Доим айтаман – мен Фергюсон билан бир вақтда 1986 йилнинг ноябрида клубга келдим. Мен кетган йили у ҳам кетди – 1 майда «Манчестер Юнайтед»ни тарк этди. «Фергюсон ҳам кетди, сиз ҳалиям шу ердасиз, ноқулай эмасми?», дерди ҳоким (Шуҳрат Ғаниев, ўша пайтдаги Фарғона вилояти ҳокими). Ва мен ҳам кетишга мажбур бўлдим. Кейинчалик бошқа клубда бош мураббий бўлиб ишлашни хоҳламадим.

«Истиқлол»га таклиф қилишди – бормадим. Ахир «Нефтчи»га қарши қандай ўйнайман? «Нефтчи» менга футболдаги барча бахтни тақдим эта олди. Унга қарши бора олмайман. «Нефтчи»дан қайта таклифлар ҳам бўлди, лекин қайтмадим. Ўтган ишлар ортда қолди, биз фақат олдинга қараб интиламиз», – дейди Юрий Вазгенович Tribuna.uz сайтига берган интервьюсида.

Эслатиб ўтамиз, Олий Лига 2013 йилги мавсумида «Нефтчи» жамоаси футболчилари «Гулистон»га қарши ўйинда (4:1) гол киритилгач, Юрий Саркисян ва жамоа аъзолари танқид қилинган вилоят газетасини мухлислар кўз ўнгида намойишкорона йиртиб ташлаганидан сўнг, Юрий Саркисян Фарғона клубидан истеъфога чиқарилган эди.