«Наполи» адвокати Маттиа Грассани А Сериянинг 3-туридан ўрин олган «Ювентус»га қарши баҳсда жамоага ёзилган техник мағлубият бекор қилинишига ишонмоқда. 

Эслатиб ўтамиз, ўшанда «Наполи» коронавирус пандемияси туфайли ўрнатилган чекловлар натижасида Туринга учишга рухсат ололмаган ва жамоага тўғридан тўғри техник мағлубият ёзилган эди. Клуб аппеляция берган, аммо ҳалигача бунга жавоб берилмади.

«Мунозаралар жуда узоқ давом этди. Аввал шунга ўхшаш нарса бўлганини эслай олмайман. Муҳокама биз учун яхши ўтди. Ўйин натижаси ташқарида эмас, майдонда ҳал қилиниши керак.

Бундай шароитда техник 
мағлубият ва очколарни камайтириш билан якунланадиган бошқа ўйинларни кўрмайсиз. Қоидаларни ва чегараларни ҳокимият белгилайди. «Наполи» эса вазият қурбони бўлди. Биз қонунни бузган жиноятчи эмасдик. Футбол жамиятдан алоҳида яшай олмайди. Бизнингча, шикоятимиз қондирилиши учун катта имкониятлар мавжуд», – дея адвокатдан иқтибос келтиради Football Italia.