Суперлига 7-туридан ўрин олган «Навбаҳор» ҳамда Сўғдиёна» жамоалари ўртасидаги ўйинда жиззахликлар ҳимоячиси Сардор Қулматов «Навбаҳор» футболчиси Аббос Ғуломовнинг бошини атайин, намойишкорона тарзда босганди. Ўша вазиятда ҳакам Қулматовга ҳаттоки сариқ карточка ҳам кўрсатмаганди.

ЎФА тартиб-интизом қўмитаси вазиятни ўрганиб чиқди ва Сардор Қулматовни иккита ўйинга дисквалификация қилди. Қўшимчасига футболчи 5 миллион сўм жарима тўлайдиган бўлди.

Тартиб-интизом қўмитаси шунингдек яна 3 нафар Про-Лига вакилларини жазолади. «Яшнобод» футболчиси Шокир Бекназаров рақибга атайин жароҳат етказиш учун қилган ҳаракати учун, «Орол» футболчиси Руслан Мелнимуратов ўйин тўхтаб турган вақтда тўпни рақибга тепиб юборгани учун 3 та ўйинга дисквалификация қилиниб, 1 миллион сўмдан жарима тўлайдиган бўлишди.

«Иттифоқ Навоий» футболчиси Алимардон Муродов эса ҳакамни сўккани учун 3 миллион сўм жаримага тортилди.