«Аякс» яримҳимоячиси Франки де Йонг бугун ЕЧЛ нимчорак финалининг илк ўйинида «Реал»га қарши майдонга тушишга тайёр.

Амстердам клуби бош мураббийи Эрик тен Хаг ўйин олдидан матбуот анжуманида шогирди тикланиб улгурганини маълум қилди. Унинг айтишича, 21 ёшли футболчи соғайиб, ўз формасини тиклаб олган.

Де Йонг ўтган ҳафта охирида ички чемпионатдаги «Ҳераклес»га қарши баҳсда захирага олинган эди. У бу мавсум «Аякс»нинг 32 ўйинида 3+3 маҳсулдорлик кўрсаткичини қайд этди.

«Аякс»-«Реал» учрашуви бугун Тошкент вақти билан тунги соат 01:00да бошланади. Аввалроқ меҳмонлар ҳимоячиси Рафаэль Варан гриппга чалингани учун бу ўйинни ўтказиб юбориши мумкинлиги хабар қилинганди.