«Барселона»нинг янги хариди Френки де Йонг «ПСЖ» ёки «Манчестер Сити»дан ҳам бўлган жиддий таклифлар ҳақида тўхталиб ўтди.

«Мен «ПСЖ» билан музокаралар ўтказдим. Кейин Максвеллга қўнғироқ қилиб, уларнинг жамоасига ўтмасликка қарор қилганимни айтдим, агентим эса қароримни французлар клуби раҳбариятига етказди. Менда Гвардиола билан «Манчестер Сити»га ўтиш масаласида ҳам музокаралар бўлди. Клублар ҳамиша сени ишонтиришга қаттиқ ҳаракат қилишади. «Барселона» ҳам мени қўлга киритиш учун кўп ишлар қилди, бунинг учун раҳбариятга миннатдорчилик билдираман. Улар аввалдан мени ўз жамоаларида кўришни исташарди, ўтган йили ҳам шартнома таклиф қилишган. Аммо уларнинг бюджети бор ва улар бекорга катта маблағ сарфламасликлари керак. Тарихдаги энг қимматбаҳо голланд футболчиси бўлиш жуда ёқимли. Мени асл нархим 5 миллион, 150 ёки 200 миллионлиги қизиқтирмайди.

«Барселона» ўйинларини ёшлигимдан бери кузатиб келаман, футболни тушуна бошлаш даврим Гвардиола даврига тўғри келади. Мен жамоанинг катта мухлиси эдим. Менга жамоанинг барча футболчилари ёққан, мен ҳамиша Мессига алоҳида мухлислик қилганман. Лекин мен Барселонага Мессини томоша қилиш учун борган сайёҳ бўлиб қолмайман», — дея де Йонгнинг сўзларини келтирган NOS нашри.

«Барселона» Френки де Йонгни «Аякс»дан 75 миллион евро эвазига харид қилди ва у билан 5 йиллик шартнома тузди. 21 ёшли футболчи жамоага 2019 йилнинг 1 июлида бориб қўшилади. У каталонияликлар жамоасининг энг кўп маош олувчи футболчиларидан бири бўлади.