Европа трансфер бозорида энг бозори чаққон икки ёш футболчи – Маттейс де Лигт ва Френки де Йонг ҳали «Аякс» асосий жамоасида дебют қилмай туриб «Манчестер Юнайтед»га ўтиши эҳтимоли бўлган. «МЮ»нинг ёшлар билан ишлаш бўйича собиқ раҳбари Дерек Лэнгли MEN Sport`га берган интервьюсида шу ҳақда маълум қилди.

«Де Лигт номзодига рад жавоби берилган. У ҳақида клубда қанча ҳисоботлар бўлганини худо билади. Бу ерга келмаган Френки де Йонг ва яна бошқа футболчиларни ҳозир бутун Европа танийди. Яна бир мисол – «Лейпциг»даги Дайот Упамекано.

Бу масалада Эд Вудворд (ижрочи директор – Tribuna) билан учрашиб, баъзиларнинг клубда қолиши мақсадга мувофиқ эканига шубҳам борлигини билдирган эдим. Эд Вудвордга тўғридан-тўғри шундай деганман: «Агар мени шу лавозимда ўтириб, ўзим эшитишни истаган нарсаларни айтиб туради, деб ўйлаётган бўлсангиз, мен ундайлардан эмасман. Чунки сизга нарсаларни қандай кўрсам, худди шундайлигича гапираман».

Менимча, шу гапларим ҳам охир-оқибат етти ойдан кейин ишдан кетишимга сабаблардан бири бўлган. Мен уларнинг ғоясига юз бурмай, улар эшитишни истаган нарсаларни гапирмаган эдим.

Бу ҳам футболнинг бир қисми – унга кириб келган одам бу жиҳатларни қабул қилиши керак. «МЮ» у ерда сарфлаган вақтим ва мен олиб келган футболчилар учун ташаккур айтди. Шундай бўлса-да, менга қулоқ солишганида орамиз яна ҳам яхшироқ бўларди», - деб айтиб ўтди Лэнгли.

Маълумот учун, 68 ёшли Дерек умрининг 16 йилини шу клубга бағишлаган, маҳаллий селекционер даражасидан то Европа бўйича бош скаут ва клуб академияси селекция хизмати раҳбари лавозимигача кўтарилган. У 2000-2016 йилларда Маркус Рэшфорд, Жесси Лингард, Жерар Пике, Дэнни Уэлбек, Том Клеверли, Жузеппе Росси ва Аднан Янузай каби футболчиларни клубга тавсия этган.

Эътиборлиси, ўша йилларда Лэнглининг қўл остида тўлиқ ставкада ишловчи фақатгина икки нафар (Жанубий Америка ва Европа бўйича) скаут бор эди, қолган ходимларнинг фаолияти тўлиқ иш вақт асосида кечмаган. Ҳозирга келиб эса «қизил иблислар»нинг жаҳон бўйлаб 50 нафардан ортиқ скаути фаолият юритади.