Jahonning eng qimmatbaho futbolchilari elon qilindi: Ronaldu yuqori o'nlikka kiritilmadi
Nov. 5, 2018, 6:26 p.m. 20222

«PSJ» klubi va FranTsiya terma jamoasi hujumchisi Kilian Mbappe CIES Football Observatory tadqiqot markazi taqdim etgan jahonning eng qimmatbaho futbolchilari reytingining birinchi o'rnida qayd etildi. Bu haqda tashkilot rasmiy sayti malum qilingan.

Tadqiqot xulosalariga ko'ra, JCh-2018 g'olibining joriy transfer qiymati 216,5 million evroni tashkil etadi. Mbappening narxi o'tgan oy bilan solishtirganda 23 millionga oshgan. Undan keyingi o'rinda ko'rsatilgan hujumchi Harri Keynni («Tottenhem» / Angliya) 197,3 mln evroga sotib olish mumkin bo'lsa, yuqori uchlikni yakunlab bergan Neymarga («PSJ» / Braziliya) 197 million evro narx belgilangan.

CIES talqiniga ko'ra, eng qimmatbaho o'yinchilar o'nligidan Muhammad Saloh («Liverpul», € 173 mln), Filippe Koutino («Barselona», € 171,3 mln), Lionel Messi («Barselona», € 170,6 mln), Rahim Sterling («Manchester Siti», € 164,6 mln), Romelu Lukaku («Manchester Yunayted», € 164,3 mln), Dele Alli («Tottenhem», € 163,4 mln) va Antuan Grizmann («Atletiko», € 157,7 mln) ham o'rin olgan.

Reytingda «Yuventus» hujumchisi Krishtianu Ronalduning transfer narxi 123,6 mln evro etib ko'rsatilgan.

Malumot uchun, CIES futbol rasadxonasi o'zi ishlab chiqqan ilmiy metodologiya asosida har oy futbolchilar transfer qiymatini hisoblab chiqadi.