Ўзбекистон олимпия жамоаси яримҳимоячиси Аббосбек Файзуллаев ҳам Осиё Кубоги U-23 финалини ўтказиб юборадиган бўлди. 

«U-23 Осиё кубогида миллий жамоамизнинг тарихий натижасига муносиб ҳисса қўшган футболчимиз Аббосбек Файзуллаев келишувга мувофиқ навбатдаги муҳим ўйинларга тайёргарлик кўриш учун Москвага йўл олмоқда.   

ЎФА Олимпиада йўлланмасини қўлга киритишда легионеримизнинг миллий жамоамиз ихтиёрига етиб келишига кўмаклашгани учун ЦСКА клубига миннатдорчилик билдиради», — деб ёзади ЎФА матбуот хизмати.

Эслатиб ўтамиз, 30 апрел куни Абдуқодир Ҳусанов («Ланс») ва Ҳожимат Эркинов («Ал Ваҳда») ҳам Ўзбекистон олимпия жамоаси базасини тарк этиб, клублари ихтиёрига қайтишганди. 

Ўзбекистон олимпия жамоаси турнир яримфиналида Индонезияни (2:0) мағлуб этиб, Париж олимпиадасига йўлланма қўлга киритди. Темур Кападзе шогирдлари 3 май кунги финалда Япония билан тўқнаш келади.