«Милан» бош мураббийи Стефано Пиоли А Серия 33-туридан ўрин олган «Интер» (1:2) билан ўйиндан сўнг ўз фикрларини билдирди. 

Ушбу баҳсдан сўнг «нерадзурри» 20-бор Италия чемпионлигини қўлга киритди. 

«Мен йигитларга далда беришга ҳаракат қилдим, чунки бу — аламли мағлубият. Футболчиларни ишонтиришга бор кучим билан ҳаракат қилдим, чунки биз мавсумни яхши якунлашимиз керак. Шанба куни бизни яна бир муҳим баҳс кутмоқда. Афсуски, бу дербида дурангга ҳам эриша олмадик.

«Интер» ажойиб чемпионат ўтказди, бор-йўғи 1 та ўйинда мағлуб бўлди, аммо 3-4 йилдан буён улар лигадаги энг кучли таркибга эга эканлигини инкор этолмайсиз. Бизга келадиган бўлсак, муҳим ўйинларда очко йўқотдик. 

«Интер» ва унинг энг яқин таъқибчилари ўртасидаги тафовут жуда катта экан, демак у жуда кучли, қолганлар эса кейинги даражага чиқишлари керак.

Ўйлайманки, бу сўнгги вақтлардаги энг тенг дерби бўлди, бизга омад кулиб боқмади», — деди Пиоли DAZN эфирида.