ФИФА расмий сайти март ойи якунларига кўра, миллий жамоаларнинг янги рейтингини эълон қилди. Унга кўра, Ўзбекистон жамоаси икки поғонага юқорилаган.

Сречко Катанец шогирдлари 2023 йилни 68-ўринда якунлаган бўлса, Қатарда ўтган Осиё кубогидан кейин 66-ўринга кўтарилганди. Март ойидаги ФИФА кунлари доирасида Ҳонгконгга қарши ЖЧ-2026 2-саралаш босқичидаги ғалабалардан кейин (2:0, 3:0) Ўзбекистон миллий жамоаси ЖЧ-2026 ҳал қилувчи саралаш босқичи ва Осиё кубоги-2027га йўлланмасига эга чиқиб, рейтингда 64-ўринга юқорилади.

Қайд этиш жоиз, 64-ўрин Ўзбекистоннинг 2017 йилдан кейинги энг яхши натижаси саналади. Сўнгги марта Самвел Бабаян мураббийлигидаги миллий жамоамиз 2017 йил апрел ойида ФИФА рейтингида 60-ўринга кўтарилганди.

ФИФА рейтингида Аргентина миллий жамоаси 1-ўринда бормоқда, Франция 2-ўрин, 3-ўриндаги Англия эса ўрнини Белгияга бўшатди ва 4-ўринга тушди. Бразилия (5), Португалия (6), Нидерландия (7), Испания (8), Италия (9) ва Хорватия (10) ўнликдан жой олган.

Осиё жамоалари топ-10лик орасида эса қитъа чемпионига айланган Қатар энг катта ўсишга эришди – 37-ўриндан 34-поғонага кўтарилиб, Осиёда бешликдан жой олган. Вакилларимиз топ-8ликдан ўрин олган. Япония қитъада пешқадам саналади – 17-ўрин. Осиёда топ-10ликдан Эрон (20), Жанубий Корея (23), Австралия (24), Қатар (34), Саудия Арабистони (53), Ироқ (58), Ўзбекистон (64), БАА (67) ва Иордания (71) жой олган.

Маълумот учун, Ўзбекистон миллий жамоасининг ФИФА рейтингидаги энг яхши натижаси – 45-ўрин бўлиб, вакилларимиз 2006-2007 йилларда ушбу ўринда қайд этилганди.