«Рома» яримҳимоячиси Неманья Матич Италия А Сериясини тарк этмоқда.

Инсайдер Жанлука Ди Марцио хабарига кўра, 35 ёшли сербиялик хавбек Жозе Моуриньо билан муносабати совуқлашгани сабабли Рим клубини тарк этмоқда. 

«Рома» Матични 3 миллион евро эвазига Франциянинг «Ренн» клубига сотишга рози бўлди. Сербиялик футболчи «Манчестер Юнайтед» ва «Челси»да ҳам португалиялик мураббий қўл остида тўп сурган.

Қайд этилишича, Моуриньо Матич ўрнига «ПСЖ» яримҳимоячиси Леандро Паредесни жамоага қайтармоқчи. У 2014/15 ва 2016/17 йилларда римликлар сафида тўп сурганди.