«Реал Мадрид» Килиан Мбаппени жамоанинг янги футболчиси сифатида таништириш учун материаллар тайёрлади. Мадрид клуби матбуот хизмати янги футболчининг тақдимоти учун видео ва графикаларни тўплаяпти. 

Испаниянинг Marca нашри хабарига кўра, бундай тайёргарлик Мбаппенинг трансфери бўйича келишув якунланган дегани эмас. «Реал» ўтган йили ҳам франциялик футболчининг тақдимотига тайёргарлик кўрган эди, ўшанда трансфер амалга ошмай қолганди. 

Футболчи ҳозирда тўп сураётган «ПСЖ» аллақачон у билан алоқани узишни бошлаган. Foot Mercato хабарига кўра, парижликлар «Парк де Пренс» стадиони фасадидан футболчи тасвирлаган постерни олиб ташлаган. Шу билан бирга, ОАВ хабарларига қарамай, Мбаппе исми туширилган футболкалар «ПСЖ» расмий дўконида ҳамон сотилмоқда.

Июнь ойида футболчи француз клуби билан шартномани узайтириш вариантини фаоллаштирмаслиги маълум бўлди. «ПСЖ» Мбаппени жамоадан четлатди ва шартномани узайтиришдан бош тортгани учун мавсум учун аризадан олиб ташлаши мумкин. ESPN хабарига кўра, футболчи «ПСЖ»нинг Лига 1 янги мавсумидаги «Лорян»га қарши биринчи ўйинини ва, эҳтимол, август ойидаги барча ўйинларини ўтказиб юборади.

Аввалроқ, таниқли футбол инсайдери Фабрицио Романо Саудиянинг «Ал-Ҳилол» клуби парижликларга ҳужумчини 300 миллион еврога трансфер қилиш бўйича расмий таклиф билан чиққани ҳақида хабар берганди - бу футбол тарихидаги энг юқори сумма. Аммо Мбаппе бу ёзда «Реал»дан бошқа клубга ўтиши даргумон, дея таъкидлайди L’Equipe. 

Мбаппе 24 ёшда, у 2017 йилда «Монако»дан «ПСЖ»га ўтган эди. Франциялик футболчи Париж клуби сафида 260 та ўйин ўтказиб, 212 та гол урган ва 98 та голга ассистентлик қилган. Жамоа билан бирга у беш карра Франция чемпиони, шунингдек, уч карра Франция кубоги соҳибига айланди. Футболчи миллий жамоа таркибида 2018 йилги жаҳон чемпиони ҳисобланади. 2023 йил август ойи бошида Transfermarkt футболчининг трансфер нархини 180 миллион еврога баҳолади.