04.01.2021 03:38
33074
Теглар
«У «Ювентус»га келиши керак» – «Лацио»га қарши ўйиндан кейин италиялик мухлислар Шомуродов ҳақида нималар дейишди?

Ўзбекистон миллий жамоаси ҳужумчиси Элдор Шомуродов Италия А Серияси 15-туридан ўрин олган «Лацио»га қарши ўйинда «Женоа» сафидаги энг ёрқин ўйинларидан бирини ўтказди. Иккинчи бўлимда захирадан майдонга тушган ҳужумчи «Сампдория» ва «Парма»га қарши баҳсда бўлгани каби яна қутқарувчи вазифасида пайдо бўлди.

Шомуродов 58-дақиқада тўпни майдоннинг «Женоа» ҳаракат қилаётган томонида қабул қилиб олиб, олдинга борди ва ажойиб дриблинг билан Лукас Лейвани алдаб, Дестронинг гол уриши учун деярли ҳамма ишни қилиб берди. Худди «Сампдория»га қарши ўйинда Скамаккага амалга оширган узатмаси каби. Дестронинг голи «Женоа»ни мағлубиятдан қутқариб қолди ва кучли рақиб билан ўйинда Баллардини жамоаси очко олди.

Шомуродов А Сериядаги иккинчи самарали ҳаракатини амалга оширди. «Парма»га қарши ўйинда А Сериядаги илк голини урган Элдор бу гал биринчи марта голга ассистентлик қилди. Аслида «Милан»га қарши ўйиндаги Дестронинг голида ҳам Элдор голга ассистентлик қилганди десак, тўғри бўлади, чунки айнан унинг зарбасидан сўнг Доннарумманинг қайтарган тўпини Дестро голга айлантирганди. Масалан, футбол менежер ўйинларида бу ҳаракатга очко ёзилади.

Шунингдек, Элдорнинг ҳисобида Италия кубогида амалга оширилган битта ассист бор. Шу тариқа Элдор Шомуродовнинг Италиядаги фаолиятида ҳозирча шундай статистика: 10 та ўйин, 1 та гол, 2 та ассист. «Лацио»га қарши ўйинда Элдор учун ўзини кўрсатиш икки карра муҳим эди, чунки янги мураббийи Баллардини уни олдинги ўйинда захирада қолдирганди. Шу сабаб Элдор янги устозига майдонга тушишга ҳақли эканини исботлашни хоҳларди. Бунинг уддасидан чиқди ҳам. Баллардини ўйиндан кейин «Шомуродов ва Дестронинг комбинациси сизни ажаблантирдими?» деб берилган саволга хотиржам жавоб берди: «Элдорни машғулотларда мураббий сифатида кузатяпман, Дестрони эса анчадан бери биламан. Шу сабаб уларнинг ҳаракати мени ажаблантирди дея олмайман».

Бироқ Твиттерда италиялик мухлислар Элдорнинг ҳаракатларига Баллардини каби хотиржам баҳо беришмади. Кўпчилик у ҳақда илиқ фикрлар билдирди, «Женоа»нинг асосий ўйинчиси деганлар ҳам бўлди ҳатто. Қуйида Элдор Шомуродов ҳақида билдирилган жуда кўп фикрлардан баъзи эътиборлиларини келтирамиз.

«Шомуродов майдонга тушган деярли барча ўйинларда бирорта самарали ҳаракатни амалга оширяпти. Техникаси жойида, Лейвани осонгина алдаб ўтиб, Дестрони қулай вазиятга олиб чиқди. Балки у мавсум давомида 15 та гол урмас, лекин айнан у ишониш мумкин бўлган футболчи», деб ёзган италиялик мухлислардан бири. Унга жавоб ёзган бошқа бир мухлис шундай деди: «У орқароқда ўйновчи плеймейкер вазифасидаги ҳужумчи бўлиши керак. Афсуски, бундай футболчи учун жон сақлаб қолиш учун курашаётган жамоа энг яхши вариант эмас».

«Бир очко ҳам ёмон эмас, айниқса унга меҳнат билан эришган бўлсанг. Баллардини зўр ўзгаришлар қилди, Шомуродов чемпионлардек порлади».

«Элдордан яхшироқ ўйинни кутяпман, у ҳужумни якунлаш устида ишлаши керак. Асосийси, ақлли футболчи. Менга қолса, доим Элдор ва Дестро бирга ўйнасин».

«Ювентус»нинг тўртинчи ҳужумчиси Шомуродов бўлиши керак. У ўзбек Каваниси».

«Маттиа [Дестро] зўр, лекин Элдор шедеврни амалга оширди».

«Шомуродов бу учрашувда зўр ўйнади. Ажойиб ассист ва гол уришига ҳам озгина қолди».

«Шомуродов олқишга муносиб ўйин кўрсатди. Бор гап шу».

«Шомуродов «Лацио»нинг учта ҳимоячисини ўзига қаратиб, Дестрога қулай вазият яратди. Ҳақиқий ҳужумчи».

Рус нашрлари ҳам Элдорнинг ўйинларини ҳамон кузатиб бормоқда. Матч ТВ унинг ажойиб ассистини мухлисларига улашди.

«Ростов»нинг фан каналларида ҳамон Шомуродовнинг муваффақиятидан хурсанд бўлишади. Ахир Элдор айнан улар учун 61-рақамни танлаган-ку.

«Ростов» мухлисларидан бири Элдорнинг ассистини шундай изоҳлади: «Шомуродовнинг Италияда 61-рақамда ўйнаётганини томоша қиляпман».

«Рома» мухлислари эса Элдорнинг ассисти орқали «Лацио»ни тролл қилишди: «Сиз ҳеч қачон тўртга икки чиқиб гол уролмаган бўлардингиз», қабилида твит ёзди «бўрилар» мухлисларидан бири «Лацио»нинг аккаунтини белгилаб.

Маълумот учун, Элдор Шомуродов мавсум аввалида Россиянинг «Ростов» клубидан «Женоа»га ўтган. Унинг трансфери учун генуяликлар 7,5 миллион евро тўлаган. Шомуродовнинг ҳаракатларига қараб ростовликлар яна 1,5 миллион евро бонус олиши мумкин. Шомуродов ўзбек футболчилари ичида Илёс Зейтуллаевдан кейин «кучли бешлик»да майдонга тушган иккинчи футболчи. «Парма»га қарши ўйинда «кучли бешлик»да гол урган илк ўзбекистонликка айланган Шомуродов «Лацио»га қарши ўйинда «кучли бешлик»да голга ассистентлик қилган илк ўзбекистонлик бўлди.

1995 йил Сурхондарё вилояти Жарқўрғон туманида туғилган Элдор Шомуродов футболчилик фаолиятини Муборакнинг «Машъал» клубида бошлаган. Кейинчалик уни Тошкентнинг «Бунёдкор» клуби ўз сафига қўшиб олган. 2017 йил Шомуродов Россиянинг «Ростов» клубига ўтганди. 2015 йилдан буён Ўзбекистон миллий жамоаси сафида дебют қилган ҳужумчи ҳозиргача миллий жамоа сафида 44 та ўйинда майдонга тушиб, 20 та гол урган. Элдор бу борада фаолиятини тугатмаган футболчилар орасида Одил Аҳмедов билан бирга етакчилик қилмоқда.

Турнир жадваллари
Жамоа
W D L Pts
Сўнгги янгиликлар
Долзарб хабарлар