Ўзбекистон миллий жамоасининг жаҳон чемпионати саралаш босқичи доирасидаги БАА ва Қатарга қарши ўйинларга тайёргарлиги учун Суперлига 12-тури саналари ўзгаради. Бу ҳақда ЎзПФЛ матбуот хизмати хабар берди.

«2-10 июн саналари ФИФА кунлари сифатида белгиланган бўлиб, унда Ўзбекистон миллий жамоаси 5 июн куни Абу Дабида БАА ҳамда 10 июн куни Тошкентда Қатар жамоаларига қарши майдонга тушади. 

БАА билан учрашув мамлакат футболи тарихига кириши мумкин. Мазкур баҳсдаги дуранг натижа ҳам жамоамизни мундиал сари етаклайди.

Шундан келиб чиқиб, бош мураббий Темур Кападзе Абу Дабидаги беллашувга жиддий тайёргарлик кўришни режалаштирган. Жумладан, миллий жамоамиз сафарга одатдагидан эртароқ йўл олиб, тайёргарликни амирликларда давом эттиришни мақсад қилган. 

Маълумки, май ойининг сўнгги 10 кунлигида легионер футболчилар ҳам терма лагерига эртароқ етиб келиши мумкин. Бу ўз навбатида Кападзега жамоани эртароқ йиғиш имкониятини тақдим этади. Шундан келиб чиқиб, Ассоциация ва Лига ўзаро келишган ҳолда Суперлиганинг 12-тур беллашувларини ҳам ФИФА кунидан кейинга кўчиришга қарор қилди. Бу ўз навбатида Суперлигада иштирок этаётган футболчилар терма ихтиёрига эртароқ етиб боришини таъминлайди. 

Ўзгарган тақвим режа билан мана шу ҳавола (биринчи ярим йиллик, иккинчи ярим йиллик) орқали танишиб олишингиз мумкин. Бунда Суперлига ўйинларининг дам олиш кунларига тўғри келиши ва кубок учрашувлари ҳафта ўртасида бўлиб ўтиши принципи сақлаб қолинган бўлиб, мамлакат кубогининг чоракфинал босқичи август ойига кўчирилган. 

Ишонамизки, мамлакатимиз бош жамоаси июн ойида барча ўзбекистонликлар учун мундиал чиптасини совға қилади», — деб ёзади ПФЛ матбуот хизмати.