Эртага, яъни 23 апрел санасидан май ойининг биринчи ўн кунлигига қадар Самарқанд шаҳрига олий мартабали меҳмонлар ташриф буюриши кўзда тутилган. Бу ҳақда Самарқанд вилояти ҳокимлиги ПФЛ мактуб йўллаган.  

Ушбу хатда Суперлига 7-туридан ўрин олган Динамо — Нефтчи учрашуви санасини ўзгартириш сўралган. 

Мазкур беллашув 25 апрел куни бўлиб ўтиши лозим эди. Эндиликда Самарқанд шаҳрида бу учрашувни ўтказиш имконияти камроқ эканлигидан келиб чиқиб, у Лига тақвим режасидан захира куни сифатида ўрин олган июл ойининг дастлабки кунларидан бирида ўтказилади. Беллашувнинг аниқ санаси Ўзбекистон кубоги мусобақасининг 1/8 финал босқичига қуръа ташланганидан сўнг эълон қилинади. 

Ўзбекистон кубоги гуруҳ босқичининг сўнгги ўйинлари 21 май куни ўтказилади. 22 май куни эса мусобақанинг 1/8 финал босқичига қуръа ташланади. Суперлиганинг 13-15 тур учрашувлари саналари қуръа натижасидан келиб чиққан ҳолда эълон қилинади.

Маълумот учун, Италия бош вазири Жоржиа Мелони 25-26 апрел кунлари Самарқандга ташриф буюради.