Габон миллий жамоаси ҳужумчиси Аарон Бупенза 28 ёшида вафот этди. 

Хитойнинг «Чжецзян Профешнл» клубидан ўйнаётган футболчи ўзи яшаётган уйнинг 11-қаватидан тушиб кетган. Клуб воқеа ҳақида унинг оила аъзоларига хабар берган. 

Фожианинг 3 талқини айтилмоқда: ўз жонига қасд қилиш, тасодифан тушиб кетиш ва қотиллик. 

Айрим ОАВлар Бупензанинг ўлимига акаси билан юзага келган жанжал сабаб бўлганини таъкидламоқда. Изоҳларда эса футболчи сўнгги пайтларда депрессияда бўлгани ҳам ёзилган. 

Аарон 12 апрел куни Хитой Суперлигаси 6-туридан ўрин олган «Шанҳай Шэнҳуа»га (2:3) қарши баҳсда жамоасининг биринчи голига ассистентлик қилган. У бу мавсумда 6 ўйинда 4 гол ва 2 ассистни ўз ҳисобига ёздириб қўйганди. 

Бупенза тез-тез клуб ўзгартирадиган футболчи эди. У 2021 йил «Ҳатайспор» сафида 22 гол уриб, Туркия чемпионати тўпурари бўлган. 

Ҳужумчи ўз вақтида Габон миллий жамоасида 35 ўйинда 8 гол урган, Пер-Эмерик Обамеянг билан тандемда ҳаракат қилган.

Январ ойида Африка Кубогига қуръа ташланган ва Габон қийин гуруҳдан ўрин олганди.