«Барселона» Дани Олмо ва Пау Викторни рўйхатдан ўтказа олмади.

Аввалроқ суд икки марта «Барселона»га мавсумнинг иккинчи ярми учун футболчиларни рўйхатдан ўтказиш борасида рад жавобини берганди. «Камп Ноу»даги VIP ўриндиқларни сотиш бўйича келишув тасдиқланса, улар рўйхатдан ўтишлари мумкин эди.

Бироқ Ла Лига каталонияликлар бирор футболчини рўйхатдан ўтказа олмагани ҳақида баёнот берди.

«Ла Лига 31 декабр ҳолатига кўра, «Барселона»нинг молиявий назорат қоидаларига мувофиқ, 2025 йил 2 январдан бошлаб исталган ўйинчини рўйхатдан ўтказишга рухсат берувчи муқобил вариантларни тақдим этмаганини маълум қилади», — дейилади лига баёнотида. 

Бугун, 1 январ куни Ла Лига Олмо ва Викторни мавсум учун эълон қилинган «кўк-анорранглилар» футболчилари рўйхатидан олиб ташлади. Айни пайтда рўйхатга ҳимоячи Андреас Кристенсен қайтди — даниялик футболчининг жароҳати туфайли «Барса» Олмони мавсумнинг биринчи қисми учун таркибга қўша олганди. 

Кеча, 31 декабр куни «Барселона» Олмо ва Пау Викторни Испания футбол федерациясига рўйхатдан ўтказиш учун ариза топширганини эълон қилганди. Ушбу мурожаатнинг натижаси ҳозирча номаълум.

2024 йилнинг ёзида 55+7 млн еврога сотиб олинган Дани Олмо энди «Барса»ни эркин агент сифатида тарк этиш ҳуқуқига эга. Шу билан бирга, яримҳимоячининг агенти испаниялик футболчининг клубда қолишга қарор қилганини айтди.